‘डिजेल किङ’का रुपमा स्थापित हुँदै महिन्द्रा, अन्य ब्रान्डको अवस्था के ?

डिजेल कारको बजार पेट्रोल र सिएनजीले विस्थापित गरिरहेको सन्दर्भमा भारतमा महिन्द्राका डिजेल कारहरु सबैभन्दा धेरै बिक्री हुने ब्रान्डको रूपमा देखा परेको छ । यस वर्ष भारतमा अहिलेसम्म बिक्री भएका सबै नयाँ डिजेल कारहरूको ५० प्रतिशत हिस्सा महिन्द्राको थियो ।

इक्विरस रिसर्चका अनुसार, डिजेल कार बजारमा महिन्द्राको हिस्सा २०२४ को तुलनामा ५३ प्रतिशतबाट बढेर यस वर्ष ५६ प्रतिशत हुने अनुमान गरिएको छ । जबकी समग्र बिक्रीमा डिजेलको हिस्सा ३३ प्रतिशतबाट झरेर १८ प्रतिशतमा सिमित भएको छ ।

डिजेल कार सेग्मेन्टमा महिन्द्राको बढ्दो बजार हिस्सा स्कर्पियो–एन, थार र एक्सयूभी ७०० जस्ता मोडेलहरूको बलियो मागले संभव बनाएको हो । अर्कोतर्फ, प्रतिद्वन्द्वी ब्रान्डहरूले बजार हिस्सा गुमाउँदै जाँदा महिन्द्रा ‘डिजेल किङ’का रुपमा स्थापित हुँदै गएको छ ।

हुन्डाईको डिजेल हिस्सा २२ प्रतिशतबाट घटेर १४ प्रतिशतमा झरेको छ भने कियाको हिस्सा ११ प्रतिशतमाा सिमिते हुने अनुमान गरिएको छ । टाटा मोटर्सले आफ्नो डिजेल हिस्सा २०२५ मा ८ प्रतिशतमा झर्ने अनुमान लगाएको छ, जुन गत वर्ष १४ प्रतिशत थियो ।

मारुति सुजुकी, होन्डा र टोयोटा जस्ता अन्य ब्रान्डहरूले आफ्नो ध्यान पेट्रोल र हाइब्रिड सवारी साधनहरूमा केन्द्रित गरेका कारण डिजेलको हिस्स एकदमै न्यून रहेको छ ।