इलेक्ट्रिक सवारी साधनको लागत कम गर्न महिन्द्रा र फक्सवागनको सम्झौता

महिन्द्रा एण्ड महिन्द्राले इलेक्ट्रिक कम्पोनेन्टका लागि ग्लोबल अटो कम्पनी फक्सवागनसँग सम्झौता गरेको छ । दुबै कम्पनीले बोर्न इलेक्ट्रिक प्लेटफर्ममा मोड्युलर इलेक्ट्रिक ड्राइभ म्याट्रिक्स कम्पोनेन्ट पत्ता लगाउन सम्झौतामा हस्ताक्षर गरेका छन् ।

महिन्द्रा एण्ड महिन्द्राले आफ्नो बोर्न इलेक्ट्रिक प्लेटफर्ममा एमईबी इलेक्ट्रिक कम्पोनेन्ट जस्तै इलेक्ट्रिक मोटर, ब्याट्री सिस्टम कम्पोनेन्ट आदि समावेश गर्ने योजना बनाएको छ । सन् २०२२ को अन्त्यसम्ममा दुई कम्पनीबीचको आपूर्ति सम्झौता हुने अपेक्षा गरिएको छ ।

सो सम्झौताले इलेक्ट्रिक सवारी साधनको लागतमा कमी आउने अपेक्षा गरिएको छ । यस सम्झौतामा फक्सवागन ग्रुप कम्पोनेन्ट्सका सीईओ थोमस स्मलले महिन्द्रासँग भारतको विद्युतीय सवारीको बजारमा महत्वपूर्ण योगदान दिन चाहेको, भारतको ठूलो अटो बजारमा वृद्धिको ठूलो सम्भावना रहेको र वातावरण संरक्षणको लागि यसको सान्दर्भिकता अपार रहेको जानकारी दिएका छन् । यो तीव्र गतिमा ई–मोबिलिटीको लागि अग्रणी खुला प्लेटफर्ममा परिणत हुँदैछ ।

महिन्द्रा एण्ड महिन्द्राले भारत विश्वको शीर्ष ५ अटोमोटिभ बजारमध्ये एक भएको बताएको छ । यहाँ वार्षिक करिब ३० लाख सवारीसाधन उत्पादन हुने गरेको छ । फक्सवागन र महिन्द्राको साझा उद्देश्य भारतीय अटोमोटिभ बजारलाई विद्युतीकरण गर्नु हो । यसले सन् २०३० सम्ममा वार्षिक ५० लाख सवारी साधन उत्पादन गर्ने अपेक्षा गरिएको छ ।

महिन्द्राले घरेलु बजारमा धेरै नयाँ इलेक्ट्रिक सवारी साधन ल्याउने योजनामा काम गरिरहेको छ । बोर्न इलेक्ट्रिक प्लेटफर्ममा आधारित ३ वटा नयाँ इलेक्ट्रिक गाडीको अवधारणा जुलाई २०२२ मा सार्वजनिक गरिनेछ । साथै कम्पनीले यो वर्ष केयूभी ईभी र एक्सयूभी ३०० लन्च गर्ने योजना बनाएको छ ।