विद्युतीय माइक्रो बसमार्फत उपत्यकाबाहिर महानगर यातायातको सेवा विस्तार

काठमाडौं–महानगर यातायात प्रालिले आफ्नो सेवा काठमाडौं उपत्यकाबाहिर विस्तार गरेको छ । कम्पनीले शनिबार काठमाडौंमा आयोजित कार्यक्रममा पोखरा, चितवन जिल्ला र भैरहवामा २० वटा विद्युतीय माइक्रो बस (ईभी)मार्फत सेवा सुरू गरिएको जानकारी दिएको हो ।

कम्पनीका अध्यक्ष सन्तोष खतिवडाका अनुसार काठमाडौंलाई अन्य प्रमुख शहरसँग सहज रुपमा जोड्ने गरी ठूला विद्युतीय बस सञ्चालनमा ल्याउने तयारी भइरहेको छ । त्यसैगरी, निकट भविष्यमा कम्पनीलाई पब्लिक लिमिटेड कम्पनीमा रूपान्तरण गर्ने योजना रहेको समेत उनले उल्लेख गरे ।

दश वर्षदेखि काठमाडौंमा सेवा दिँदै आएको कम्पनीले यसअघि १०१ वटा बसमार्फत सेवा सञ्चालन गर्दै आएको थियो। कम्पनीका बसहरू काठमाडौंको चक्रपथ क्षेत्रमा तथा थानकोटदेखि धुलिखेलसम्म सञ्चालन हुँदै आएका छन् ।