लुआन ब्रान्डको इलेक्ट्रिक स्कुटर नेपाली बजारमा, मुल्य १ लाख ५४ हजार

नेपाली बजारमा पछिल्लो समय लुआन ब्रान्डको इलेक्ट्रिक स्कुटर भित्रिएको छ । चीनमा निर्मित यो स्कुटरलाई जीरो इमिसन राइड नामको संस्थाले आधिकारिक बिक्रेताका रुपमा नेपाल भित्राएको हो । हाल यसको एउटामात्र मोडल एमएनके३ उपलब्ध रहेको र निकट भबिष्यमा थप मोडल समेत भित्राउँदै जाने कम्पनीले बताएको छ ।

काठमान्डौको नयाँ बजार, ललितपुरको मंगलबजार र पोखरबाट यसको बिक्री समेत प्रारम्भ भैसकेकोे छ । यो स्कुटरको मुल्य १ लाख ५३ हजार ९ सय ९९ सय रुपैयाँ निर्धारण गरिएको छ । यो स्कुटर खरिद गर्न चाहन ग्राहकले तत्कालका लागि हेलमेट, फेसशिल्ड र स्कुटर कभर निशुल्क पाउनेछन् भने थप ५ हजार नगद छुटको समेत ब्यवस्था मिलाएको छ ।

यो स्कुटरमा १ हजार ५ सय वाट क्षमताको लिक्विड कुल हव मोटर जडान गरिएको छ । जुन सेग्मेन्टकै पहिलो रहेको दाबी गरिएको छ । डिआरएल सहितको एलइडी हेडलाइट दिइएको यस स्कुटरको लुक्स आकर्षक र स्पोर्टी देखिन्छ ।

३२ एम्पियर क्षमताको लिड एसिड ब्याट्रि जडान गरिएको स्कुटरलाई फास्ट चार्जर मार्फत ३ देखी ४ घन्टामा फुल चार्ज गर्न सकिन्छ । एकपटक फुल चार्ज गरेपछि ७५ देखी ८५ किलोमिटरसम्म लामो यात्रा गर्न सकिन्छ । त्यसैगरी यसको पछाडी चक्कामा रन फ्ल्याट टायर जडान गरिएको छ भने अगाडी चक्कामा डिस्क र पछाडी सेरामिक ड्रम ब्रेक दिइएको छ ।

यसको डिजिटल कन्सोलमा स्पिड र बाँकी चार्जले कति किलोमिटरसम्म स्कुटर कुद्छ भनेर हेर्न सकिने ब्यवस्था मिलाइएको छ । यसका अतिरिक्त एन्टि थेफ्ट अलार्म, अटो ह्विल लक, चाइल्ड लक र युएसबी पोर्टजस्ता सुबिधा समेत दिइएको छ । जसले स्कुटरलाई अत्याधुनिक, सुबिधासम्पन्न र सुरक्षित बनाएको छ ।