९० को दशकको लोकप्रिय स्कुटर एलएमएल इलेक्ट्रिक स्कुटर सहित पुनरागमन हुने

मोटरसाइकल निर्माता कम्पनी एलएमएलको पुनरागमन हुने भएको छ । कम्पनीले चाँडै नै ३ वटा नयाँ इलेक्ट्रिक स्कुटर सार्वजनिक गर्ने तयारी गरिरहेको छ । कम्पनीले आगामी दिनमा नयाँ स्कुटरको फिचर, डिजाइन, टेक्नोलोजी, कार्यक्षमता र अन्य जानकारी प्रस्तुत गर्नेछ ।

एलएमएलले अर्को महिना अर्बन मोबिलिटी स्पेस सुदृढ गर्न आफ्नो नयाँ रूप र रणनीति खुलासा गर्नेछ । कम्पनीले नयाँ इलेक्ट्रिक स्कुटरका कन्सेप्ट भेरिएन्टलाई विश्वव्यापी ईभी बजारमा लन्च गर्नुअघि राम्रोसँग परीक्षण गरिने जानकारी दिएको छ ।

एलएमएल इलेक्ट्रिकका एमडी र सीईओ डा. योगेश भाटियाका अनुसार, विश्वव्यापी रूपमा एलएमएल पुनरागमनले खुसी भएको र पहिलो ३ इलेक्ट्रिक सवारी साधनको अवधारणा सेप्टेम्बर २९ मा अनावरण गरिने जानकारी दिएका छन् ।

कम्पनीले सेप्टेम्बर २९ मा सार्वजनिक गरिने स्कुटरको बारेमा खुलासा गरेको छैन । हालसम्म यसको उत्पादनको बारेमा पनि कुनै जानकारी सार्वजनिक गरिएको छैन । भाटियाका अनुसार एलएमएलको नयाँ स्कुटर उत्कृष्ट टेक्नोलोजी र फिचरले सुसज्जित हुने र विश्वव्यापी उपभोक्ताको विश्वास र मायालाई अझ बलियो बनाउने प्रष्ट पारेका छन् ।

एलएमएलले यस वर्षको सुरुमा हार्ले डेभिडसनका लागि बाइक उत्पादन गर्ने कम्पनी सिएरा इलेक्ट्रिक अटोसँग साझेदारी गरेको छ । सिएरा इलेक्ट्रिकले एलएमएलको आगामी इलेक्ट्रिक स्कुटर पनि निर्माण गर्ने अपेक्षा गरिएको छ ।