नेदरल्याण्डले सौर्य उर्जाबाट चल्ने कार निर्माण गर्ने, रेन्ज ६२४ किलोमिटर

नेदरल्याण्डको लाइटइयर कम्पनीले विगत छ वर्षदेखि सौर्य ऊर्जामा चल्ने ईभीमा काम गरिरहेको छ । सो कम्पनीले चाँडै नै यो सोलारबाट चल्ने कार उत्पादन गर्ने तयारी गरिरहेको छ । लाइटइयर जिरो इलेक्ट्रिक सेडान कार हुनेछ । यसको मूल्य २ लाख ६६ हजार डलरबाट सुरु हुनेछ ।

लाइटइयर जिरोको डिजाइन कम्पनीको लाइटइयर वानसँग मिल्दोजुल्दो देखिनेछ, जसलाई २०१९ मा सार्वजनिक गरिएको थियो । सो कारमा कार्बन फाइबरबाट बनेको टियरड्रप बडी रहेको छ ।

लाइटइयर जिरोमा ओआरभीएमको सट्टामा क्यामेराको प्रयोग गरिएको छ । कम्पनीले यसको साइड स्कर्टको डिजाइनमा पनि केही परिवर्तन गरेको छ । लाइटइयर जिरोको रङमा भने केही परिवर्तन गरिएको छैन । कम्पनीले यसको इन्टेरियर डिजाइनमा पनि अपडेट गरिएको छ ।

लाइटइयर जिरोको क्याबिनमा माइक्रोफाइबर अपहोल्स्ट्री, प्लान्ट बेस्ट लेदर, रिसाइकल गरिएका बोतलबाट बनेको कपडा, रतन पाम वुड ट्रिम र इन्सुलेटेड पार्टिकल फोम सामग्री प्रयोग गरिएको छ । यसको ड्यासबोर्डमा १०.१ इन्चको टचस्क्रिन इन्फोटेनमेन्ट सिस्टम रहेको छ जुन एन्ड्रोइड अटोमोटिभ अपरेटिङ सिस्टममा चल्छ । लाइटइयर जिरोमा बिल्ट–इन नेभिगेसन, एन्ड्रोइड अटो र एप्पल कारप्ले, फोन–ए–की र ओभर–द–एयर अपडेट जस्ता फिचर समावेश गरिएको छ ।

लाइटइयर जिरोमा ४ इलेक्ट्रिक मोटरको साथमा ६० केडब्ल्युएच ब्याट्री प्याक जडान गरिएको छ । जसले १७४ बीएचपीको पावर र १७२० एनएमको टर्क जेनेरेट गर्छ । सो कारले १० सेकेन्डमा ० देखि १०० किलोमिटर प्रतिघण्टाको गति लिन सक्ने कम्पनीले जनाएको छ । सो कारको टप स्पिड १६० किलोमिटर प्रतिघण्टा रहेको छ ।