लीपमोटरको राजश्व शत् प्रतिशत बृद्धि, पहिलोपटक कमायो मुनाफा

चिनियाँ अटोमेकर लीपमोटरले पहिलो पटक वार्षिक नाफा हासिल गरेको छ । २०२५ को वित्तीय प्रतिवेदन अनुसार, कम्पनीले बिक्री र राजस्व दोब्बर बनाउँदै नाफा आर्जन गरेको हो ।

सन् २०१५ मा स्थापना भएको यस कम्पनीले २०१९ देखी न्यू इनर्जी भेइकल बिक्री सुरु गरेको थियो । पछि २०२३ को अन्त्यमा लीपमोटरले विश्वको सबैभन्दा ठूलो मध्ये एक अटोमोटिभ ग्रुप स्टेलान्टिसलाई आफ्नो २० प्रतिशत सेयर बिक्री गरेको थियो ।

सार्बजनिक भएको वित्तिय रिपोर्टअनुसार लीपमोटरले वर्ष २०२५ मा विश्वव्यापी रूपमा ५ लाख ९६ हजार ५५५ युनिट कार बिक्री गरेको छ । जुन गत वर्षको तुलनमा १०३ प्रतिशतले बढी रहेको जनाइएको छ । सो वर्ष लीपमोटरले बी१० क्रसओभर, बी०१ सेडान, र लाफा५ ह्याचब्याक कार लन्च गरेको थियो ।

२०२५ मा आफ्नो राजस्व १०१.३ प्रतिशतले बढेर ९.३८ अर्ब अमेरिकी डलर पुगेको कम्पनीले खुलासा गरेको छ । त्यसैगरी, कुल नाफा मार्जिन १४.५ को रेकर्ड ब्रेक बिन्दुमा पुगेको बताइएको छ । कम्पनीको खुद नाफा ५४० मिलियन युआन (७६.८५ मिलियन अमेरिकी डलर) पुगेको उल्लेख गरिएको छ । प्रतिवेदन अनुसार २०२४ मा कम्पनी ४१० मिलियन अमेरिकी डलर को वार्षिक खुद घाटमा थियो ।

लीपमोटरले हाल ४० देशहरूमा ९०० भन्दा बढि बिक्री र बिक्री पछिको सेवा आउटलेटहरू स्थापना गरेको छ । कम्पनीले बी१० क्रसओभर र लाफा५ ह्याचब्याक उत्पादन गर्ने योजनासहित स्पेनमा एसेम्वलिङ प्लान्ट स्थापना गरिरहेको छ ।

लीपमोटर नेपाली बजारमा समेत बिक्री हुँदै आएको ईभी ब्रान्ड हो । सांग्रिला मोटर्स आधिकारिक वितरक रहेको यस ब्रान्ड अन्तर्गत हाल नेपालमा टी०३ ह्याचब्याक, सी१० र बी१० एसयूभी उपलब्ध छन् ।