चीनमा लन्च भयो लिपमोटर बी१०, एक घण्टामै १५ हजार बढी बुकिङ

चाइनिज एनईभी ब्रान्ड लिपमोटरले चीनमा लिपमोटर बी१० कम्प्याक्ट इलेक्ट्रिक क्रसओभर सार्वजनिक गरेको छ । सो अवसरमा पहिलो एक घण्टामै १५ हजार भन्दा बढी अर्डर प्राप्त गरी महत्वपूर्ण उपलब्धि हासिल गरेको छ ।

अत्याधुनिक फिचर सहितको लिपमोटर बी१० पाँच भेरिएन्टमा उपलब्ध छ, जसको मूल्य १ लाख ९ हजार ८०० देखि सुरु हुन्छ । लिडार सेन्सर सहितको पहिलो ईभी र १ लाख २० हजार आरएमबी भन्दा कम मूल्यको ईभी भनेर समेत यसले चर्चा पाएको छ ।

बी१० को लम्बाई, चौडाई र उचाई क्रमशः ४५१५ एमएम, १८८५ एमएम र १६५५ एमएम छ भने ह्विलबेस २७३५ एमएम छ ।

यसमा स्ट्रिपले कनेक्ट गरिएको स्लिम एलईडी रनिङ लाइट छ भने रुफमा लिडार सेन्सरका साथै फ्लस डोर ह्यान्डल र रियरमा सिंगल पिस टेललाइट रहेको छ ।

इन्टेरियरमा १४.६ इन्चको फ्लोटिङ इन्फोटेनमेन्ट युनिट, ८.८ इन्चको एलसीडी इन्स्ट्रयुमेन्ट क्लस्टर, वायरलेस चार्जर र फोल्डिङ टेबलका लागि एङकोर प्वाइन्ट सहितको युनिक सेन्टर कन्सोल रहेको छ ।

दुई भेरिएन्टमा उपलब्ध हुने बी१० को बेस भेरिएन्टमा १३२ किलोवाटको सिंगल ई–मोटर छ, जुनमा भएको ५६.२ किलोवाट आवरको एलएफपी ब्याट्रीले सीएलटीसी अनुसार ५१० किलोमिटरको रेन्ज दिन्छ ।

यसको लङ रेन्ज भेरिएन्टमा १६० किलोवाटको मोटर छ, जुनमा भएको ६७.१ किलोवाट आवरको एलएफपी ब्याट्रीले सीएलटीसी अनुसार ६०० किलोमिटरको रेन्ज दिन्छ । यो गाडीले ६.८ सेकेन्डमा १०० किलोमिटर सम्मको गति लिन सक्छ ।

चिनियाँ बजारमा यसले बीवाईडी एट्टो ३ लगायतका ईभीसँग प्रतिस्पर्धा गर्न सक्छ । नेपालमा पनि लिपमोटर ब्रान्ड बिक्रीका लागि उपलब्ध छ । यसका आधारमा भविष्यमा यो ईभी नेपाली बजारमा पनि उपलब्ध हुने अनुमान गर्न सकिन्छ ।