चर्चामा लिपमोटरको नयाँ एसयूभी ए१०, नेपालमा प्रतीक्षा

लिपमोटरको नयाँ एसयूभी ए१० ले अहिले चर्चा पाइरहेको छ । इन्ट्री लेभल ईभी एसयूभी प्याकेजमा भएको प्रिमियम स्टाइलका कारण यसको विशेष चर्चा भएको हो ।

चीनबाट बिक्री सुरु हुने ए१० एसयूभी ४० र ५३ किलोवाट आवरको दुई ब्याट्री अप्सनसहित आउने छ । यसमा रहेको सानो ब्याट्री ३९.८ किलोवाट आवरको छ । जसको सीएलटीसी रेन्ज ४०३ किलोमिटर दाबी गरिएको छ । यसले अनरोडमा ३०० किलोमिटर आसपास रेन्ज दिने अनुमान छ ।

ठूलो ५३ किलोवाट आवरको ब्याट्रीले ५०५ किलोमिटर रेन्ज दिने सीएलटीसीले जनाए पनि सडकमा ३७० किलोमिटर आसपासको रेन्ज रहनेछ । चार्जिङको मामलामा पनि यो मोडल उत्कृष्ट रहने छ । यसलाई डीसी चार्जरको सहायताले १६ मिनेटमा ३० देखि ८० प्रतिशत चार्ज गर्न सकिन्छ ।

‘टेक्नोलोजिकल नेचुरल एस्थेटिक २.०’ डिजाइन ल्यांग्वेजमा तयार भएको ए१० एसयूभीमा स्माइलिङ हेडल्याम्प र हाहा टेललाइट दिइएको छ । यसको लम्बाइ ४२७० एमएम, चौडाइ १८१० एमएम र उचाइ १६३५ एमएम रहेको छ । ह्विलबेस २६०५ एमएम लामो छ ।

नेपाली बजारमा सांग्रिला मोटर्सले २०२६ को मध्य सम्ममा ए१० एसयूभी उपलब्ध गराउने अनुमान गरिएको छ । यसले नेपाली बजारमा बीवाईडी एट्टो २ लगायतका मोडलसँग प्रतिस्पर्धा गर्नेछ ।