स्किम सहित सस्तो मूल्यमा बाइक र कार किन्न पाइने आज अन्तिम दिन

काठमाडौं – नेपाली बजारमा उपलब्ध विभिन्न बाइक तथा कारहरु सस्तो मूल्यमा किन्नका लागि आज अन्तिम दिन हो । नेपाली बजारमा उपलब्ध विभिन्न नयाँ बाइक तथा कारका लागि आयातकर्ता कम्पनीहरुले उपलब्ध गराएको स्किम अन्तर्गतको सुविधा आज देखि बन्द हुँदैछ ।

आयातकर्ता कम्पनीहरुले नयाँ वर्ष २०७८ को अवसरमा ल्याएको अफर निषेधाज्ञाका कारण बैशाख १६ गते पश्चात उपलब्ध हुन सकेको थिएन । निषेधाज्ञाको समयमा घरैमा बस्नु परेको अवस्थामा धेरैले यसको प्रयोग गर्न पाएनन् । यही कुरालाई मनन गरी कम्पनीहरुले सो अफरको म्याद असार ३१ सम्म बढाएका थिए ।

हुन्डाई, फक्सवागन लगायतका कार कम्पनी र सुजुकी, बजाज लगायतका बाइक कम्पनीहरुले यस्ता अफर ल्याएका छन् । ५० प्रतिशत डाउन पेमेन्ट देखि लिएर शून्य प्रतिशत ब्याज सम्मको अफरमा यस्ता सवारी साधन किन्न पाइन्छ । नगद रकम बुझाएको आधारमा विभिन्न छुट स्किम समेत उपलब्ध छ ।

यी सबैका कारण आज सो अफर प्रयोग गर्न सकिने अन्तिम दिन हो । विशेष गरी नयाँ सवारी साधन किन्नै पर्नेहरुले यो अवसरको सदुपयोग गरी केही रकम भए पनि छुट प्राप्त गर्न सकिन्छ ।