कलर टिएफटी डिस्प्लेसहित अपडेट भएर आयो केटीएम आरसी २००

केटीएमले आरसी २०० को नयाँ संस्करणमा केही फिचर अपडेट गरेको छ । आरसी २०० को २०२५ संस्करणलाई कम्पनीले चुपचाप अपडेट गरेको हो । बाइक अब कलर टिएफटी डिस्प्ले र नयाँ स्विचगियर सहित आउँनेछ ।

अपडेट गरिएको आरसी २०० हालै भारतस्थित एक स्टकयार्डमा देखिएको थियो । बाइकमा कलर टिएफटी स्क्रिन राखिएको छ, जसले स्मार्टफोन कनेक्टिभिटी र टर्न–बाई–टर्न नेभिगेसन जस्ता सुविधाहरू प्रदान गर्दछ । यसको इन्स्ट्रयुमेन्ट कन्सोलमा मेनुहरू पहुँच गर्न चारवटा बटनहरू सहितको नयाँ स्विच क्युब समेत उपलब्ध गराइएको छ ।

आरसी २०० मा कुनै पनि मेकानिकल परिवर्तनहरू भने गरिएको छैन । बाइकमा १९९.५ सीसी, लिक्विड–कुल्ड सिंगल–सिलिन्डर इन्जिन जडान गरिएको छ । जसले २५.४ बीएचपी पावर र १९.५ एनएम टर्क जेनेरेट गर्दछ ।

सस्पेन्सन सेटअपको कुरा गर्नुपर्दा बाइकको अगाडि डब्लुपी एपेक्स यूएसडी फोर्क र पछाडि डब्लुपी मोनो–शक समावेश गरिएको छ । दुबै चक्कामा डिस्क ब्रेक राखिएको यस मोटरसाइकलमा डुअल–च्यानल एबीएस समेत उपलब्ध गराइएको छ ।

केटीएम आरसी नेपाली बजासमा समेत उपलब्ध रहँदै आएको मोटरसाइकल हो । हंसराज हुलासचन्द एन्ड कम्पनीले बिक्री गर्ने यस मोटरसाइकलको मूल्य नेपाली बजारमा ६ लाख ९५ हजार रुपैयाँ पर्छ ।