केटीएम नेपाल र एक्सट्रिम इनर्जी ड्रिंकको साझेदारीमा ‘केटीएम एक्सट्रिम इन्ड्युरो डे’ आयोजना हुने

काठमाडौं – केटीएम नेपाल र एक्सट्रिम इनर्जी ड्रिंकको साझेदारीमा आगामी माघ १७ गते ‘केटीएम एक्सट्रिम इन्ड्युरो डे’ कार्यक्रम आयोजना हुने भएको छ ।

केटीएम बाइकको नेपालका लागि आधिकारिक वितरक हंसराज हुलासचन्द एन्ड कम्पनी प्रालि अन्तर्गतको केटीएम नेपालसँग साझेदारी गर्दै एक्सट्रिम इनर्जी ड्रिंकले काठमाडौंस्थित हात्तिवन फरेस्ट रिसोर्टमा ‘केटीएम एक्सट्रिम इन्ड्युरो डे’ कार्यक्रम गर्न लागेको हो। बाइक लभर र स्टन्ट लभरहरूका लागि ठूलो अवसर भएकाले यसमा भाग लिई उपहार जित्न सक्ने केटीएम नेपालले जनाएको छ।

बिहान १० बजे सुरू हुने केटीएम इन्ड्युरो डेमा ‘टाइम ल्याप च्यालेन्ज’ प्रतिस्पर्धामा विजेताले आकर्षक उपहारहरू जित्न सक्नेछन्। ‘केटीएम इन्ड्युरो ३९०आर’ बाइक भने कार्यक्रमस्थलमै प्रतिस्पर्धीलाई उपलब्ध गराउने आयोजकले जनाएको छ। प्रतिस्पर्धामा आफ्नो व्यक्तिगत बाइक भने आवश्यक हुने छैन।

प्रतिस्पर्धामा भाग लिनेहरूका लागि रजिस्ट्रेसन शुल्क फ्रि गरिएको छ। जसमा सहभागी हुन चाहनेहरू ‘केटीएम रेडी टु रेस’ पेजमा गएर क्यूआरमार्फत स्क्यान गरेर प्रतिस्पर्धामा भाग लिन सक्नेछन्। सिट संख्या सीमित भएकाले छिट्टै रजिस्ट्रेसन गर्न अनुरोधसमेत गरिएको छ।

‘एक्सट्रिम एक्सपिरिएन्स जोन’ नाम दिइएको स्टलमा विभिन्न खेल लगायतका अन्य गतिविधिहरू आयोजना गरिनेछन्, जसमा अन्य व्यक्तिहरूले पनि भाग लिएर पुरस्कार हात पार्न सक्नेछन्। आगामी दिनहरूमा युवा पुस्तालाई यस्तै ऊर्जा र उत्साहित बनाउने कार्यक्रमहरू ल्याउने केटीएम नेपालले जनाएको छ।