५५०० मिटर उचाइमा अवस्थित ढुकुङ्ला पास पुग्ने पहिलो मोटरसाइकल बन्यो केटीएम ३९० इन्डुरो

काठमाडौं–केटिएमले हालसालै लन्च गरेको नयाँ मोटरसाइकल ३९० इन्डुरो आर डोल्पाको ढुकुङ्ला पाससम्म पुगेको छ । केटीएम नेपालका प्रतिनिधिहरुले ३९० इन्डुरो आरमा डोल्पाको ढुकुङ्ला पाससम्मको यात्रा गरेका हुन् । त्यो नै ढुकुङ्ला पास पुग्ने पहिलो मोटरसाइकल समेत भएको छ । ५५०० मिटर हाइटमा अवस्थित पासमा केटीएमको तीन मोटरसाइकल लिएर राइडहरु पुगेका थिए ।

केटीएम मोटरसाइकलको नेपालका लागि आधिकारिक बिक्रेता कम्पनी हंशराज हुलाश चन्द एण्ड कम्पनीले हालै ३९० इन्डुरो आर नेपालमा सार्वजनिक गरेको थियो । नेपालमा इन्डुरो मोटरसाइकल धेरै महंगो पर्ने भएको कारण कम मूल्यमा आएको केटीएम ३९० एन्ड्यूरो आरले अहिले निकै राम्रो चर्चा पाइरहेको छ ।

३९० इन्डुरो आरमा थर्ड जेनेरेशन केटीएम ३९० मा प्रयोग भएको उही ३९९ सीसी, सिंगल–सिलिन्डर इन्जिन जडान गरिएको छ । उक्त इन्जिनमा सानो सिलिन्डर हेड, नयाँ इन्धन इन्जेक्टरहरू, पुनः डिजाइन गरिएको एयरबक्स र नयाँ एक्जस्टका साथ ठूलो भल्व कभर रहेको छ । साथै यसको गियरवक्समा समेत सुधार गरिएको छ ।

सो नयाँ मोटरसाइकलमा स्लिपर क्लच, क्विक शिफ्टर प्लस सिस्टम, एबीएस, युएसबी–सी चार्जिङ पोर्ट, ब्लुटुथ कनेक्टिभिटी र टर्न–बाई–टर्न नेभिगेसन जस्ता सुविधाहरू सहितको नयाँ ४.२–इन्च डिजिटल इन्स्ट्रयुमेन्ट कन्सोल दिइएको छ ।

टु–पीस स्टिल ट्रेलिस फ्रेममा आधारित यस मोटरसाइकलमा २५ एमएम ह्यान्डलबार राइजर र सब–फ्रेम माउन्ट दिइएको छ । यस मोटरसाइकल विशेष गरी अफ–रोड प्रयोगको लागि इन्जिनियर गरिएको हो ।