कियाले लन्च ग-यो प्रिमियम इलेक्ट्रिक क्रसओभर ईभी६, भारतमा १०० युनिट मात्र बिक्री गरिने

लामो प्रतीक्षा पश्चात भारतमा कियाको इलेक्ट्रिक क्रसओभर ईभी६ लन्च गरिएको छ । प्रिमियम इलेक्ट्रिक कार किया ईभी६ जीटी लाइन रियर ह्विल ड्राइभ र जीटी लाइन अल ह्विल ड्राइभ गरी दुई भेरिएन्टमा उपलब्ध हुनेछ । यसको मूल्य क्रमशः ५९ लाख ९५ हजार र ६४ लाख ९६ हजार भारु तोकिएको छ ।

किया ईभी६ को दुवै भेरिएन्टमा ७७.४ किलोवाट आवरको ब्याट्री प्याक हुनेछ, जसले फुल चार्जमा ५२८ किलोमिटर रेन्ज दिने बताइएको छ । यसलाई ३५० किलोवाट डीसी फास्ट चार्जरको सहयोगले १८ मिनेटमै ८० प्रतिशत सम्म चार्ज गर्न सकिन्छ ।

भारतमा यो वर्ष किया ईभी६ बिक्रीका लागि १०० युनिट मात्र उपलब्ध हुनेछ । यसलाई सीबीयूको रुपमा लिइने छ । यसले गर्दा पहिले नै यो सोल्ड आउट भइसकेको छ । हाल सम्म ३५५ युनिट बुकिङ भइसकेको र भारतका १२ प्रमुख सहरका १५ डिलरसिपमार्फत यसको बुकिङ गर्न सकिने बताइएको छ । यसका लागि ३ लाख भारु टोकन मनीको रुपमा उपलब्ध गराउनु पर्ने व्यवस्था छ ।

किया ईभी६ मा लक्जरियस क्याबिनका साथमा धेरै फिचर उपलब्ध छन् । यसमा वायरलेस एन्ड्रोइड अटो र एप्पल कार प्ले सपोर्ट सहितको १२.३ इन्चको इन्फोटेनमेन्ट सिस्टम, ८ एयरब्याग, अल ह्विल डिस्क ब्रेक, इलेक्ट्रोनिक स्ट्याबिलिटी कन्ट्रोल, भेइकल स्ट्याबिलिटी म्यानेजमेन्ट, हिल स्टार्ट असिस्ट कन्ट्रोल, मल्टि–कोलिजन ब्रेक असिस्ट आदि उपलब्ध छन् ।

त्यसैगरी एबीएस, इमर्जेन्सी स्टप सिग्नल, फ्रन्ट र रियर पार्किङ सेन्सरका साथै आइसोफिक्स चाइल्ड एंकर जस विशेषता छन् । ईभी६ को डेलिभरी यस वर्ष सेप्टेम्बरमा सुरु हुनेछ । किआ मोटर्सले यो प्रिमियम इलेक्ट्रिक कारमा ८ वर्ष वा १ लाख ६० हजार किलोमिटरको ब्याट्री ग्यारेन्टी दिएको छ ।

नेपाली बजारमा पनि यो गाडी उपलब्ध गराउने तयारी भइरहेको पहिले देखि नै समाचार आइरहेका छन् ।