किया ईभी६ बन्यो युरोपको ‘कार अफ द इयर २०२२’, नेपाल आउने तयारीमा

कियाले हालै अन्तर्राष्ट्रिय बजारमा लन्च गरेको इलेक्ट्रिक कार ईभी६ युरोपको ‘कार अफ द इयर’ बनेको छ । युरोपका प्रतिष्ठित ५९ पत्रकारहरुको समूहले प्रदान गरेको अंकका आधारमा ईभी६ ले सो उपाधि पाएको हो ।

यस अनुसार किया ईभी६ ले २७९ अंक प्राप्त गरेको थियो । त्यसैगरी दोस्रो र तेस्रो नम्बरमा रहेको रेनो मेगान इलेक्ट्रिकले २६५ र हुन्डाई आयोनिक ५ ले २६१ नम्बर प्राप्त गरेका थिए ।

चौथो, पाँचौ, छैटौं र सातौ नम्बरमा क्रमशः प्युजो ३०८, स्कोडा इन्याक आईभी, फोर्ड मस्ट्याङ म्याच–ई र कुप्रा बोर्न रहेका छन् ।

यसरी पुरस्कृत हुने धेरै आधारहरु मध्ये एक टेक्निकल एड्भान्स्मेन्ट थियो । यो त्यस्तो अवार्ड हो, जसमा कार निर्माता कम्पनीहरूले वास्तवमै जित हात पार्न चाहन्छन् । उनीहरूले यसलाई खरिद गर्न वा नतिजालाई प्रभावित पार्न समेत सक्दैनन् । यसका लागि उनीहरूले राम्रो कार बनाएर प्रवेश सुनिश्चित गर्नुपर्ने हुन्छ ।

नेपालमा समेत किया ईभी६ छिट्टै नै उपलब्ध हुने गरी तयारी भइरहेको बताइएको छ । अर्डर भइसकेको भए पनि अपेक्षित मात्रामा उत्पादन हुन नसकेको र अन्तर्राष्ट्रिय बजारमा धेरै माग भएकाले तोकिएको समयमा नेपाली बजारमा उपलब्ध हुन नसकेको बताइएको छ । कम्पनी स्रोतका अनुसार १ महिना देखि २ महिना भित्रमा यो कार नेपाली बजारमा उपलब्ध हुनेछ । यसको बुकिङ समेत प्रारम्भ भइसकेको छ ।

कियाको सो ईभी६ इलेक्ट्रिक कार नयाँ ईभी प्लेटफर्ममा तयार गरिएको छ । सो प्लेटफर्म हुन्डाई आयोनिक ५ मा पनि प्रयोग गरिएको थियो । सो एसयूभी ३ भेरिएन्ट ईभी६, ईभी६ जीटी र ईभी६ जीटी लाइनमा प्रस्तुत गरिएको छ ।

ईभी६ नयाँ डिजाइन फिलोसोफी अपोजिट्स युनाइटेडको रुपमा डिजाइन गरिएको छ । किया ईभी६ इलेक्ट्रिक कारमा दुई ब्याट्री प्याक समावेश गरिएको छ । लङ रेन्ज भेरिएन्टमा ७७.४ केडब्ल्युएच ब्याट्री प्याक र स्ट्यान्डर्ड भेरिएन्टमा ५८.० केडब्ल्युएचको ब्याट्री प्याक समावेश गरिएको छ । ईभी६ जीटी लाइनमा सो दुबै ब्याट्री समावेश गरिएको छ ।

तर, ईभी६ जीटीमा लङ रेन्ज ब्याट्री मात्र समावेश गरिएको छ । यो कम्पनीको पहिलो इलेक्ट्रिक कार हो जसमा २ ह्विल ड्राइभ र ४ ह्विल ड्राइभ दुबैको विकल्प रहेको छ ।