काठमाडौँ–नमोबुद्ध टुरिङ -याली आयोजना हुँदै, १०० बढी राइडर सहभागी हुने

काठमाडौं– विश्व पर्यटन दिवसको अवसरमा नासा(नेपाल अटोमोबाईल्स एसोसिएसन) नेपाल र बीमा नेपालले संयुक्त रुपमा काठमाडौँ–नमोबुद्ध टुरिङ -याली आयोजना गर्ने भएका छन् । हरेक वर्ष जस्तै यस वर्षपनि विश्वभरी पर्यटन दिवसको अवसर पारेर असोज १३ गते सो -याली आयोजना गर्न लागिएको हो ।

-यालीमा उपत्यका पर्यटन कार्यालय, हातिवन, ललितपुरले समेत सहकार्य गर्ने भएको छ । नासा नेपाल र सो संस्थाका विभिन्न क्लबहरूले विगतका वर्षमा पनि पर्यटन प्रवर्धन गर्ने हेतुले बिभिन्न कार्यक्रम आयोजना गर्दै आएका थिए ।

उपत्यका पर्यटन कार्यलयले बागमती प्रदेशमा रहेका विभिन्न पर्यटकिय क्षेत्रको पहिचान गर्नुका साथै प्रवर्धनात्मक कार्य गर्ने र यससँग सम्बन्धित संघ संस्थाहरुसँग सहकार्य गर्दै आन्तरिक पर्यटनलाई बढावा दिँदै आएकोमा यस वर्ष काठमाडौँ नजिकैको लोकप्रिय गन्तब्य नमोबुद्धसम्म टुरिङ्ग र्‍याली आयोजना गर्न लागिएको नासा नेपालले जनाएको छ ।

१०० भन्दा बढि राइडर सहभागी रहने उक्त -यालीको मुख्य उद्देश्य युवा तथा मोटरसाइकल चालकहरुलाई आन्तरिक पर्यटनमा जोड्नु रहेको छ ।

सानो हातिवनस्थित उपत्यका पर्यटन कार्यालयबाट बिहान ८ बजे सुरु हुने सो र्‍याली कोटेश्वर–सल्लाघारि–सागाँ–बनेपा–धुलिखेल हुदै नमोबुद्ध पुग्नेछ भने पुनः धुलिखेल आएर समापन हुनेछ । र्‍यालीको लागि सन्तोष न्यौपाने, सञ्जु बज्रचार्य र मिङ्मा डोल्मा तामाङ रहेको समिति गठन गरिएको छ ।