अब २ लाख रुपैयाँ कम मूल्यमै सानो क्युट ईभी

काठमाडौं – २० लाख रुपैयाँ हाराहारीमा सानो र कम्प्याक्ट ईभी किन्नेका लागि नयाँ अवसरको सिर्जना भएको छ । नेपालका लागि केई ईभीको आधिकारिक वितरक लक्ष्मी ई-मोबिलिटी र जीओ अटोमोबाइल्सले पहिले भन्दा दुई लाख रुपैयाँ कम मूल्यमै केई ई–क्युट ०२ ईभी उपलब्ध गराउने घोषणा गरेका छन् ।

केई ई–क्युट ०२ को मूल्य पहिले २२ लाख ९६ हजार रुपैयाँ रहेकोमा अब २० लाख ९६ हजार रुपैयाँ मात्र तोकिएको हो । ४० किलोवाट मोटर र २८.०८ किलोवाट आवर ब्याट्रीयुक्त सो ईभीले सिंगल चार्जमा ३०० किलोमिटरको रेन्ज दिने बताइएको छ ।

ड्युअल एयरब्याग, एबीएस, एचएसी, आइसोफिक्स, स्टिल केज फ्रेम लगायतका सेफ्टी फर्स्ट फिचर रहेको केई ई–क्युट ०२ मा ३६० डिग्री भ्यु क्यामेरा, पुस स्टार्ट बटम लगायतका विभिन्न फिचर रहेका छन् ।

केई ई–क्युट ०२ मा १०.२५ इन्चको टचस्क्रिन, चार वटा ड्राइभिङ मोड, अटोमेटिक हेडल्याम्प, १५ इन्चको टायर, अटो विन्डो क्लोजिङ, रिमोट विन्डो कन्ट्रोल, कोलम ड्राइभ सिफ्टर, सेन्सर लकिङ र अनलकिङ, ड्राइभर आर्मरेष्ट लगायतका फिचर समेत रहेका छन् ।

नेपाली बजारमा धेरै मोडलका इलेक्ट्रिक गाडी उपलब्ध छन् । मूल्य कम गरिएका कारण सानो र चिटिक्क परेको पारिवारिक ईभी खोज्नेका लागि केई ई–क्युट ०२ धेरैको रोजाइमा पर्न सक्छ ।