कबिरा मोबिलिटीले ल्यायो हाल सम्मकै सर्बाधिक ३४४ किमी रेन्ज दिने नयाँ इलेक्ट्रिक बाइक केएम५०००

कबिरा मोबिलिटीले नयाँ केएम५००० इलेक्ट्रिक क्रुजर बाइक ल्याएको छ । यो भारतको सबैभन्दा तीव्र र लामो रेन्जको इलेक्ट्रिक बाइक भएको दाबी गरिएको छ । कम्पनीले केएम५००० ले एक पटक चार्जमा ३४४ किलोमिटरको रेन्ज दिने दाबी गरेको छ । यसको टप स्पिड १८८ किमी प्रतिघण्टा छ । यसको डेलिभरी २०२४ देखि सुरु हुने कम्पनीले घोषणा गरेको छ ।

केएम५००० कबिरा मोबिलिटीको नयाँ फ्ल्यागसिप ई–बाइक हो । बाइकको डिजाइनको बारेमा अझै खुलाइएको छैन । सो इलेक्ट्रिक क्रुजर सिंगल सिटर हो र इलेक्ट्रिफाइड बबर स्टाइल सुविधा दिन्छ । यसमा प्रोजेक्टर हेडल्याम्पका साथै फुल एलईडी लाइटिङ पनि छ । बाइकको अगाडि र पछाडि चौडा टायर समावेश छ ।

कबिरा मोबिलिटीले डेल्टा ईभीसँगको सहकार्यमा इलेक्ट्रिक पावरट्रेन विकास गरेको छ । यो मोडल ११.६ केडब्ल्युएच एलएफपी ब्याट्री प्याकको साथमा उपलब्ध हुनेछ ।

केएम५००० मा टेलिमेटिक्स, कनेक्टिभिटी, ७ इन्चको टचस्क्रिन डिजिटल कन्सोलका साथै म्युजिक कन्ट्रोल, टायर प्रेसर मोनिटरिङ सिस्टम, साइड स्टेप, फास्ट चार्जिङ, पार्क असिस्ट, फल सेन्सर र एलिभेसन स्ट्याबिलाइजर तथा अन्य फिचर हुने दाबी गरिएको छ ।

केएम५००० मा फ्रन्टमा ट्विन डिस्क र रियरमा सिंगल डिस्क स्ट्यान्डर्डको रुपमा ड्युअल–च्यानल एबीएस हुनेछ । यो बाइकमा शोवा यूएसडी फ्रन्ट फोर्क्स र ग्यास चार्ज भएको नाइट्रोक्स रियर मोनोसक उपलब्ध हुनेछ ।