४ वर्षपछि चीन फर्कदै जिप, डोङफेङसँगको सहकार्यमा न्यु इनर्जी भेइकल उत्पादन गर्ने

अमेरिकी अटो निर्माता कम्पनी जिप ४ वर्षपछि पुनः चीन फर्कने भएको छ । स्टेलान्टिस मातहत सञ्चालन हुँदै आएको जिप चिनियाँ ब्रान्ड डोङफेङसँगको साझेदारीमा पुनः चीन फर्कन लागेको हो ।

२०२७ देखि चीनमा प्युजो र जिपको न्यु इनर्जी भेइकल( एनईभी) उत्पादन गर्ने गरी स्टेलान्टिस र डोङफेङ समूहले मे १५ मा रणनीतिक सहयोग सम्झौतामा हस्ताक्षर गरेका छन् ।

सम्झौता अन्तर्गत, डोङफेङ–प्युजो–सिट्रोन अटोमोबाइल संयुक्त उद्यमले आफ्नो वुहान प्लान्टमा दुई नयाँ मोडलका प्युजो एनईभी र जिपका दुई नयाँ अफराेड एनईभी उत्पादन गर्ने अपेक्षा गरिएको छ । जसअन्तर्गत जिपका मोडल निर्यातका लागि मात्र हुनेछ भने प्युजोका एनईभी भने घरेलु र निर्यात दुबै बजारका लागि उपलब्ध हुनेछन् ।

सो नयाँ परियोजनाका लागि ८ अर्ब युआन (१.१८ अर्ब अमेरिकी डलर) भन्दा बढी लगानी हुने र जसमा स्टेलान्टिसले लगभग १३० मिलियन युरो योगदान गर्ने अपेक्षा गरिएको छ । यो घोषणाले २०२२ मा जीएसी–स्टेलान्टिस संयुक्त उद्यमको अन्त्य पछि चीनमा स्थानीय उत्पादनमा जिपको पुनरागमन हुने पक्कापक्की भएको हो ।

सम्झौताअनुसार, स्टेलान्टिसले डोङफेङ प्रविधि प्रयोग गरेर नयाँ जिप एसयूभी विकास गर्ने योजना बनाएको छ । साथै, प्लेटफर्म, ब्याट्री र पावरट्रेन सेयरिङमा समेत दुई कम्पनीबिच सहकार्य हुने जनाइएको छ ।