तीन महिनामा शतप्रतिशत बढ्यो जिप कार आयात

काठमाडौं – आयात निर्यात कारोबारका हिसाबले सबैभन्दा ठूलो वीरगञ्ज भन्सारबाट सवारीका साधनको आयात ह्वात्तै बढेको छ । चालू आर्थिक वर्ष (आव) २०७८/७९ को साउनदेखि असोजसम्मको ३ महिनामा यस्ता वस्तुको आयात बढेको हो ।

वीरगञ्ज भन्सार कार्यालयका अनुसार चालू आवको ३ महिनामा यो नाकाबाट ३ अर्ब ३६ करोड रुपैयाँबराबर मूल्यका २ हजार ९१७ ओटा जिपकार भ्यान भित्रिएका छन् । यो संख्या गत आवको सोही अवधिभन्दा १०१ प्रतिशत बढी हो ।

गत आवको पहिलो ३ महिनामा १ अर्ब ६५ करोड रुपैयाँबराबरका १ हजार ४५० वटा यस्ता साधन भित्रिएका थिए ।

चालू आवको पहिलो त्रैमासमा मोटरसाइकलको आयात भने करिब उस्तै छ ।

१ अर्ब ८० करोड मूल्यका २० हजार ८५५ वटा मोटरसाइकल आयात भएको वीरगञ्ज भन्सारको तथ्यांक छ । त्यसैगरी यो अवधिमा पिकअप गाडीको आयातसमेत ९९ प्रतिशतले बढेको छ ।

ट्रकबसको चेसिसको आयात ३ गुणा बढेको छ । गत आवको पहिलो ३ महिनामा २२० वटा यस्ता साधन भित्रिएकोमा यो वर्ष ६५९ पुगेको बताइएको छ ।