दोस्रो विश्वयुद्ध सम्झाउने जावाको अर्को बाइक जावा पेराक नेपाल भित्रिदै, यस्तो हुन सक्छ मूल्य

काठमाडौं – नेपाली बजारमा पनि जावा पेराक बाइक भित्रिने भएको छ । नेपालका लागि जावा बाइकको आधिकारिक वितरक अग्नि मोटोइंकले सो बाइक छिट्टै नै नेपाल भित्र्याउने तयारी गरिएको बुझिएको छ ।

यसको मूल्य ७ लाख ५० हजार रुपैयाँको हाराहारी पर्ने अनुमान गरिएको छ । यो मार्च महिना भित्रै नेपाली बजारमा सो बाइक भित्र्याउने तयारीका भइरहेको छ । 

जावा पेराक एक बबर स्टाइल बाइक हो । जावा पेराकको नाम दोस्रो विश्वयुद्धको समयमा पेरिसमा भाएको मोटर शोमा पेश गरिएको पेराक बाइकबाट लिइएको हो । नयाँ पेराक बाइकमा ३३४ सीसीको सिंगल सिलिन्डर, लिक्विड कुल्ड इन्जिन जडान गरिएको छ जसले ३० बीएचपीको पावर र ३१ न्युटन मिटरको टर्क जेनेरेट गर्छ ।

सो इन्जिनमा ६ स्पिड गियरबक्स समावेश गरिएको छ । यसको इन्जिन बीएस ६ मापदण्ड अनुरुपको छ । यसमा ड्युअल च्यानल एबीएसका साथ दुवैतिर डिस्क ब्रेक दिइएको छ । बइकमा इन्टिग्रेटेड टेल लाइट, टियरडप फ्युल ट्यांक र वाइड ह्यान्डलबार रहेका छन् ।

नेपाली बजारमा पहिले देखि नै दुई मोडलका बाइक जावा क्लासिक र जावा फोर्टी टु उपलब्ध छन् । 

दुवै मोडलका बाइक सिंगल च्यानल र ड्युअल च्यानल एबीएस भेरिएन्टमा उपलब्ध छन् ।

नेपाली बजारमा विशेष गरी रोयल इन्फिल्डका बाइकसँग यो ब्रान्डको प्रतिस्पर्धा हुने अनुमान गरिएको छ ।

यी दुईओटै बाइक २९० सीसी क्षमताका हुन् । यी बाइकमा भएका डीओएचसी इन्जिनले २७ बीएचपी पावर र २८ एनएम टर्क जेनेरेट गर्छ ।

जावा फोर्टी टु सिंगल च्यानल एबीएसको मूल्य ६ लाख २० हजार र ड्युअल च्यानल एबएिसको मूल्य ६ लाख ४८ हजार रुपैयाँ तोकिएको छ ।

त्यसैगरी जावा क्लासिक सिंगल च्यानल एबीएसको मूल्य ६ लाख ४८ हजार ५ सय र ड्युअल च्यानल एबीएसको मूल्य ६ लाख ७६ हजार ५ सय रुपैयाँ तोकिएको छ ।