‘राजधानी पछि अटो बजारको नेतृत्व चितवनले गर्नुपर्छ भन्ने मान्यताका साथ क्रियाशील छौं’

राजन पिया चितवनमा जारी चितवन अटो शो २०२६ का संयोजक हुन् । उनी नेपाल अटोमोबाइल्स एसोसिएसन, बागमती प्रदेशका संयोजक तथा उक्त अटो शोको आयोजक चितवन अटोमोबाइल्स डिलर्स एसोसिएसनका पूर्व अध्यक्ष हुन् ।

बैशाख १७ देखि सुरु भएको चितवन अटो शो आगामी बैशाख २१ सम्म चल्ने छ । चितवन अटोमोबाइल डिलर्स एसोसिएसन र चितवन अटोमोबाइल्स एसोसिएसनको संयुक्त आयोजनामा भइरहेको अटो शोलाई सफल बनाउन भरतपुर महानगरपालिका, चितवन उद्योग संघ र चितवन उद्योग वाणिज्य संघले सहयोग गरेका छन् ।

यसै सन्दर्भमा अटो शो संयोजक पियासँग गरिएको कुराकानीको सारसंक्षेप प्रस्तुत गरिएको छ ।

नेपालमा हुने विभिन्न अटो शो काठमाडौं केन्द्रित भइरहेको समयमा तपाईंहरुले काठमाडौं बाहिर चितवनमा समेत यसको आयोजना गर्नुभएको छ ? दर्शकहरुको प्रतिक्रिया कस्तो पाउनुभएको छ ?
दर्शकहरुको प्रतिक्रिया एकदमै सकारात्मक छ । धेरै सम्भावित क्रेता दर्शकहरुको उपस्थिति देखिएको छ । प्रदर्शकहरु पनि निकै नै उत्साहित हुनुहुन्छ । चितवन देशकै केन्द्रबिन्दुको रुपमा रहेको छ । यो अवस्थामा हामीले पहिले चितवन महोत्सवको अवसरमा एउटा सानो प्याभिलियनको रुपमा अटो शो आयोजना गर्ने गरेका थियौ । त्यसपछि यो भन्दा पहिले पनि एक पटक यस्तै अटो शो आयोजना भइसकेको छ । अहिले यसको दोस्रो संस्करण हो ।

तर हामी सिक्दै जाने क्रममा रहेका छौ । चितवन देशकै तेस्रो ठूलो अटो बजारको रुपमा रहेको छ । बुटवल, हेटौंडा, दमौली लगायतका सहरको नजिक केन्द्रमा रहेको र देशकै समेत केन्द्रको रुपमा चितवन रहेको छ । यो अवस्थामा राजधानी पछि अटो बजारको नेतृत्व चितवनले गर्नुपर्छ भन्ने मान्यताका साथ यहाँका अटोमोबाइल व्यवसायीहरु लाग्नुभएको छ । हामीले ५१ हजार वर्गफिट क्षेत्रफलको एसी सुविधायुक्त हलमा अटो शो आयोजना गरेका छौ ।

५ दिन सम्म चल्ने अटो शो कति दर्शकले अवलोकन गर्ने अनुमान गर्नुभएको छ ? त्यसैगरी कारोबारको हिसाबले यहाँहरुको अपेक्षा के छ ?
चितवन अटो शो २०२६ को अवसरमा १० हजार दर्शकले अवलोकन गर्ने र ५० करोड रुपैयाँ भन्दा बढीको कारोबार हुने हाम्रो अपेक्षा छ ।

पछिल्लो समयमा विद्युतीय सवारी साधनप्रतिको आकर्षण बढिरहेको छ । चितवनमा कस्तो अवस्था छ ?
चितवनमा पनि यस्तै अवस्था छ । यद्यपि केही समय पेट्रोलियम पदार्थबाट चल्ने सवारी साधनप्रतिको आकर्षण पनि बढ्न थालेको थियो । तर पछिल्लो समयमा वृद्धि भइरहेको पेट्रोलियम पदार्थको मूल्यका कारण फेरि विद्युतीय सवारी अर्थात ईभीतिरै आकर्षण बढेको देखिएको छ । हालको अवस्थामा ईभीतिर ७० प्रतिशत र अन्य सवारी साधनतिर ३० प्रतिशत बजार भएको देखिन्छ ।

अटो शोमा सवारी साधन प्रदर्शन गर्ने र ग्राहक आकर्षित गर्ने ट्रेन्ड चलिरहेको छ । तर पछिल्लो समयमा यस्ता सवारी साधनका वारेमा उनीहरु धेरै सचेत भएको पाइदैन । यस्ता प्लेटफर्ममार्फत उपभोक्ता सचेतना सम्बन्धी केही कार्य भए अझै राम्रो हुन्थ्यो कि ?
हामीले यसका लागि आवश्यक पहल गरेका थियौं । यस अनुसार शनिबार यस्तो कार्यक्रम आयोजना गर्ने योजना समेत थियो । नाइमासँगको समन्वयमा यो कार्य गर्ने योजना थियो । तर नाइमाले हाल काठमाडौंमा यस्ता कार्यक्रम गरिरहको हुनाले उहाँहरुले हामीलाई समय उपलब्ध गराउन सक्नुभएन । चितवनमा यसका लागि आवश्यक विशेषज्ञहरुको समेत अभाव भएकाले हामीले अहिले स्वतन्त्र रुपमा यो कार्य गर्न सकेनौ । तर आगामी दिनमा भने प्यानल डिस्कसन लगायतका यस्ता विभिन्न कार्यक्रम आयोजना गर्ने प्रतिबद्धता व्यक्त गर्न चाहन्छु ।

नेपालमा अटोमोबाइल आयातकर्ताहरुको दुईवटा एसोसिएसन नाडा र नाइमा छ । तर यो अटो शोमा दुवै संस्थाका प्रतिनिधिहरुको संलग्नता नदेखिएको कारण खल्लो समेत अनुभव भइरहेको अवस्था छ । यसमा तपाईंको के भनाइ छ ?
चितवन अटोमोबाइल डिलर्स एसोसिएसन नाडा र नाइमा दुवैसँग जोडिएको छैन, यो स्वायत्त संस्था हो । त्यसैगरी चितवन अटोमोबाइल्स एसोसिएसन नाइमासँग आवद्ध छ । तर हामी यी दुवै संस्थासँग संस्थागत रुपमा जोडिनु भन्दा पनि स्वतन्त्र रुपमा कार्य गर्ने लक्ष्यका साथ अगाडि बढेका हौं । यसकारण पनि संस्थागत संलग्नता नदेखिएको हो । तर पनि एक अर्को संस्थाप्रति सहयोगको सम्बन्ध भने कायमै छ ।

अन्त्यमा थप केही भन्नु छ कि ?
हामीले नेपालकै दोस्रो ठूलो अटो एक्सपोको रुपमा चितवन अटो एक्सपो २०२६ आयोजना गरिरहेका छौ । यहाँ उपस्थित अवलोकनकर्ताहरुले यसलाई अन्तर्राष्ट्रिय स्तरको रहेको भनेर प्रशंसा गरिरहनु भएको छ । तर पनि सुधार गर्नुपर्ने पक्ष धेरै छन् । यसलाई नेपालकै व्यवस्थित र ठूलो अटो एक्सपोको रुपमा व्यवस्थित गर्दै जानेछौ । चितवन र यसको आसपासका जनताले हामीलाई साथ दिनुहुने अपेक्षा छ । अहिलेको यो माहोल देख्दा अवश्य पनि हाम्रो अपेक्षा पुरा हुने विश्वास गरेका छौ ।