अटो शोको सफलतालाई कारोबार रकमसंग मात्रै जोडेर हेर्नु हुँदैन : सुरेन्द्रकुमार उप्रेतीको अन्तर्वार्ता

सवारीसाधनको कुम्भ मेला नाडा अटो शो–२०२४ भोलीदेखी काठमाडौंमा आयोजना हुँदै छ । नाडा अटोमोबाइल्स एशोसिएसन अफ नेपालले हरेक वर्ष आयोजना गर्ने उक्त मेलामा यसपटक विद्युतिय गाडीको बाहुल्यता रहेको संस्थाका महासचिव सुरेन्द्रकुमार उप्रेती बताँउछन् । ६ दिनसम्म चल्ने मेलाको व्यवस्थापन, नयाँ ब्राण्डको उपस्थिती र अटोमोबाइल व्यवसायमा यसले गर्ने योगदानका विषयमा केन्द्रित रही उप्रेतीसंग गरिएको कुराकानी यसप्रकार छ :

अटो शोलाई सफल रुपमा सम्पन्न गर्न नाडाको तयारी कस्तो छ ?

यसपटकको अटो शो हामीले भिन्न तवरले आयोजना गरेका छौ । मेलामा सहभागी हुने ब्राण्डको संख्या बढ्दै जाने तर मेलास्थल उहि पुरानै हुँदा स्थानको व्यवस्थापन निकै चुनौतीपूर्ण हुनेगरेको थियो । तर, यसपटक हामीले प्रदर्शनी हलसंगै रहेको गार्डेनलाई समेत प्रयोगमा ल्याउने भएका छौ । जसका कारण मेलास्थल पहिलेभन्दा व्यवस्थित हुनेछ । मेलालाई भब्य र व्यवस्थित बनाउन हामीले पार्किङमा बिशेष ध्यान दिएका छौ । यसैगरी दर्शकको सुरक्षा र सहजताका लागि पनि विशेष व्यवस्था मिलाएका छौ ।

यसपटकको अटो शो मुलतः ईभी शो हुने देखिन्छ, ईभी बाहेकका ब्राण्डको उपस्थिती कस्तो छ ?

बजारमा अहिले ईभीकै बर्चश्व बढिरहेका कारण सहभागी ब्राण्डहरु पनि अत्याधिक मात्रामा ईभी ब्राण्ड नै छन् । केही कम्पनीले ईभीसंगै पेट्रोलियम कारलाई समेत प्रदर्शन गर्ने तयारी गरेका छन् । कारमा सुजुकी बाहेक अन्य सबै ब्राण्डसंग ईभी मोडल हुनेछ । यसैगरी मोटरसाइकलमा पनि ईभी ब्रान्डकै बर्चश्व छ । कमर्शियल भेइकलमा पनि ईभीको मात्रै सहभागिता हुने भएको छ भने बिभिन्न ब्रान्डका टायर, लुब्रिकेन्ट्स, ब्याट्री, स्पेयर पार्ट्स एबं कम्पोनेन्ट्स र बैंक तथा वित्तिय संस्थाहरुको सहभागिता निकै उत्साहजनक छ ।

सवारीसाधनको तुलनामा स्पेयर पार्ट्स तथा कम्पोनेन्ट्सको सहभागिता निकै न्युन देखिन्छ, यस विषयमा के भन्नुहुन्छ ?

अटो शो मुलतः सवारीसाधनमै केन्द्रित भई आयोजना गरिने हुँदा यस्ता साधनको उपस्थिती ज्यादा हुन कुनै नौलो विषय होइन । यसका बावजुत पनि यसपटक लुब्रिकेन्ट्स, टायर र अन्य कम्पोनेन्ट्सको सहभागिता पनि बढेको छ । कतिपय कम्पोनेन्ट्स ब्राण्डले सहभागी ईच्छा देखाउँदा पनि स्थान अभावका कारण हामीले ती ब्राण्डलाई समेट्न सकेनौ । यो हाम्रो बाध्यता पनि हो ।

स्वदेशी उत्पादनको प्रबद्र्धनका लागी अटो शोमा खास व्यवस्था के गरिएको छ ?

यो विषय अटो शो आयोजक कमिटिको बैठकामा उठेको थियो । कतिपय साथीहरुले स्वदेशी उत्पादनको प्रबद्र्धनका लागि छुट्टै मेड इन नेपाल पेभिलियन हुनुपर्ने माग समेत गरेका थिए । तर, छलफल हुँदै जाँदा पछिल्लो समय अधिकांश ब्राण्डका मोटरसाइकल स्वदेशमै एसेम्वल हुन थालिसकेको र गाडीको समेत उत्पादन शुरु भैसकेका कारण छुट्टै पेभिलियन नचाहिने मत बलियो बन्न गयो । फलस्वरुप हामीले छुट्टै पेभिलियनको व्यवस्था गर्न सकेनौ । स्वदेशी उत्पादन थोरै भएकाले यसअघिका अटो शोमा छुट्टै पेभिलियन राखिएपनि पछिल्लो समय स्वदेशी उत्पादन बढेका कारण यसलाई निरन्तरता दिन सकिएन ।

नाडा अटो शोले सवारीसाधनको बिक्रीमा कस्तो प्रभाव पर्ने अनुमान गर्नुभएको छ ?
सवारी साधन बिक्रीको प्रमुख सिजन दशैँ/तिहारको नजिक पारेर आयोजना हुने कारण पनि अटो शोले गाडी र मोटरसाइकल खरिद गर्न चाहने उपभोक्तामा एक प्रकारको उल्लास नै ल्याउने गरेको छ । उक्त उल्लास यसपटक पनि देखिनेमा हामी ढुक्क छौँ । अटो शोमा यसपटक एक दर्जन बढी नयाँ ईभी लन्च हुने तय भएको छ । यसले पनि दर्शकको ध्यान यस्ता गाडीमा केन्द्रित हुने देखिन्छ । मेला स्थलबाटै यति रकम बरावरको गाडी बिक्री हुन्छ भन्नुभन्दा पनि यसको माहोलले दशैं तिहारमा बिक्री बढाउन निकै ठूलो भुमिका खेल्नेमा सबै व्यावसायी आश्वस्त छन् । अटो शोले गाडी बिक्री गर्न जोड दिने भन्दा पनि त्यस्ता गाडीको प्रबद्र्धन गर्न प्लेटफर्म प्रदान गर्ने हो । त्यसैले यसलाई कारोबार रकमसंग मात्रै जोडर हेर्नु गलत हुन्छ ।

अर्कोतर्फ गाडीसंग जोडिएर आउने बैंक तथा वित्तिय संस्थाहरुले पनि अटो शोमार्फत आफ्नो व्यापार बढाउने रणनिती बनाएका हुन्छन् । त्यसैगरी, भन्सारमा थन्किएका गाडी छुट्ने हुँदा भन्सारका कर्मचारी देखी कम्पोनेन्ट्स बिक्री गर्ने कम्पनीसम्मले समेत यसलाई चाडपर्बकै रुपमा लिने गर्छन् ।

अटोमोबाइल व्यवसायमा देखिएका समस्या समाधानका लागि नाडा नेतृत्वले केही गर्न नसकेको भन्ने आरोप समेत लाग्ने गर्छ । समस्यालाई लिएर सबै निकाय धाउँदा पनि माग सम्वोधन हुन नसक्नुलाई तपाँई कुन रुपमा लिनुहुन्छ ?

हो, अटोमोबाइल क्षेत्रमा अहिले अनगिन्ति समस्याहरु छन् । हामीले ति समस्याको उचित समाधानका लागी आफ्नो तर्फबाट गर्नुपर्ने सबै प्रयास गरिरहेका छौ । बजेट आउनुअघि अर्थ मन्त्रिदेखी प्रधानमन्त्रि सम्मलाई भेटेर आफ्नो कुरा राख्यौ । त्यसैगरी मौद्रिक नितीमार्फत सम्बोधन हुनुपर्ने कतिपय विषयका बारेमा राष्ट्र बैंकका गर्भनरदेखी अर्थमन्त्रि र प्रधानमन्त्रिसम्मै पनि मागहरु राख्यौ । तर, कुनै पनि निकायले हाम्रो माग सम्बोधन गर्न रुची देखाएनन् । हामीले आफ्नो समस्या राख्दै त्यसको उचित सम्बोधन गरिदिन माग गर्ने हो, तर त्यसलाई सम्बोधन गर्ने या नगर्ने सम्वन्धित निकायको कार्यक्षेत्रको विषय हो । यसमा हामीले हस्तक्षेप गर्नसक्ने कुरा पनि भएन ।

हामीले पहल गर्दागर्दै पनि सम्वन्धित निकायले चासो दिँदैन भने यस विषयलाई नाडा नेतृत्वको असक्षमतासंग जोडेर हेरिनु भएन । हामीले आफ्नोतर्फबाट गर्नुपर्ने सबै प्रयासहरु गर्दै आएका छौ । यातायातका साधनलाई कुनै समुहसंग जोडेर हेरिनु नै गलत छ । हामीले राखेका माग केवल अटोमोबाइल व्यवसायीसंग मात्रै सम्वन्धित नभएर आम पब्लिकको पनि सरोकारको विषय भएका कारण यसमा सरकार आँफै गम्भिर बन्नुपर्ने देखिन्छ ।