अब राम्रो सर्भिस र चार्जिङ सुबिधा दिने ब्रान्डमात्र टिक्छ : ज्ञानेन्द्र चन्दको अन्तर्वार्ता

ओमोडा र जेको ब्रान्डमा दर्शकको प्रतिक्रिया कस्तो पाउनुभएको छ ?

एकदमै राम्रो रेस्पोन्स पाइरहेका छौ । तीन महिना अघि लन्च भएको ओमोडा छोटो समयमै स्थापित भएको ब्रान्ड हो । हालसम्म ४ सय भन्दा बढी गाडी बिक्री गरिसकेका छौ । हालै यसको सस्तो भेरिएन्ट समेत लन्च गरका छौं । यसअघिको मोडलमा ३६० क्यामेरा र सनरुफ हटाएर जम्मा ५६ लाखमै यसलाई लन्च गरेका हौं । यसैगरी अटो शोबाट बिक्री सुरु गरेको जेको जे–६ नेपालको एकमात्र अफरोड एसयूभी भएका कारण यसमा पनि निकै राम्रो रेस्पोन्स पाएका छौ । यो एसयूभीको मूल्य पनि एकदमै आकर्षक छ ।

नयाँ ब्रान्ड जेको जे–६ नेपाली भू–बनोटका लागी कत्तिको उपयोगी छ ?

यहाँको माटो र भूगोल सुहाउँदो भएर नै हामीले जेको जे–६ लाई नेपाल ल्याएका हौ । नेपालको अधिकांश सडक अझैपनि अफरोड नै भएका कारण त्यस्ता सडकमा यो गाडी निकै उपयोगी हुनेछ । साथै पिच रोड र सिटीमा पनि चलाउन मिल्नेगरी यसको डिजाइन गरिएको छ ।

यो गाडीले बजार लिनेमा हामी एकदमै आशाबादी छौ । चेरीको उत्पादन भएका कारण प्रबिधीक रुपमा एकदमै बलियो र मजवुत छ । गुणस्तरमा कुनै शंका छैन । नेपालमा हामीले २ हजार किलोमिटर चलाएर हेर्दा पर्फमेन्स राम्रो पाएका छौ ।

ईभीका लागि आवश्यक पूर्बाधार र यसको भविष्यका विषयमा के भन्नुहुन्छ ?

ईभी सफल हुने या नहुने भन्ने कुरा सरकारको नितीमा भर पर्ने विषय हो । सरकारले ईभीमा सहुलियत दिएकै कारण अहिले बजार लिन सजिलो भएको हो । समयसमयमा परिवर्तन भैरहने अस्थिर नितीका कारण हालको सहुलियत कति समयसम्म लागु हुन्छ भन्नेमा चाँही व्यवसायी ढुक्क हुनसक्ने अबस्था छैन । यदि यो षिययमा समेत सरकारले आश्वस्त पार्न सके व्यवसायीले पनि राम्रैसंग पूर्बाधार विस्तरामा लगानी बढाउनेछन् । जसकारण चार्जिङ स्टेशन व्यापक रुपमा बढ्न गई ईभीको बजार अझै शसक्त बन्छ । प्रोडक्ट राम्रो छ र हरेक स्थानमा चार्जिङ स्टेशन पनि उपलब्ध छ भने कुनैपनि ब्रान्डको ईभीले बजार लिनेमा ढुक्क हुन सकिन्छ ।

अफरोड एसयूभी भएका कारण जेको जे–६ देशका दुर्गम भेगमा समेत सहजै गुड्न सक्ने देखिन्छ । यो गाडीलाई मध्येजनर गरी चार्जिङ स्टेशन र पूर्बाधार विस्तार कसरी गर्दै हुनुहुन्छ ?

ओमोडा ल्याएको तीन महिनाभित्रै हामीले १५ स्थानमा फास्ट चार्जिङ स्टेशन राखिसकेका छौ । त्यसैगरी १ महिनाभित्र थप १०० स्थानमा विस्तार गर्ने योजनामा छौंै । जेको जे–६ अफरोड एसयुभी भएका कारण यो दुर्गम भेगमा पनि सजिलै पुग्न सक्छ । यस्ता स्थनमा पनि हामीले चार्जिङ स्टेशन बनाउनु आवश्यक छ । जसका लागि ती स्थानमा फ्लो हुने करेन्टको गुणस्तर राम्रो हुनु एकदमै जरुरी छ । यसका लागी राज्यशले सहयोग गर्नुपर्छ । मनाङ मुस्ताङजस्ता स्थानमा समेत जानसक्ने प्रोडक्ट भएका कारण ती स्थनमा समेत चार्जिङ पूर्बाधार निर्माण गर्ने हाम्रो तयारी छ ।

बिक्रीपछिको सेवा र रिसेल भ्यालूमा ग्राहक आश्वस्त बन्न सकिरहेको देखिँदैन । यो विषयमा के भन्नुहुन्छ ?

बजारमा ईभी ब्रान्डको उपस्तिथी बढ्दै गएका कारण यी विषयमाथि आशंका बढ्दै जानुलाई जायज नै मान्न सकिन्छ । आँफुले किनेको ब्रान्डले कतै भोलिका दिनमा सर्भिस र स्पेयर पाटर््सजस्ता सुबिधा नपाउने पो हो कि भन्ने शंका उब्जनु स्वभाविक पनि हो । तर, यो विषयमा ग्राहक भन्दा पनि गाडी आयात गर्ने व्यवसायी बढि चिन्नित वन्नुपर्छ जस्तो मलाई लाग्छ । भोलिका दिनमा कुनै कम्पनीले बिक्री पछिको सेवा र चार्जिङ सुबिधा दिन सक्दैन भने उसको भविष्य त्यहिँ समाप्त हुने निश्चित छ । अवको केही समयपछि बजारमा जसले राम्रो सर्भिस र चार्जिङ सुबिधा दिन सक्छ त्यहि ब्रान्डमात्र टिक्ने देखिन्छ ।

अटो बजारका लागि नयाँ सेग्मेन्ट भएका कारण यसको रिसेल बजार अहिलनै तयार भैसकेको छैन । अवको ४–५ वर्षपछि रिसेल बजारले पनि चर्चा पाउला । ईभीको प्रमुख कम्पोनेन्ट ब्याट्रीमा नै ८ वर्षसम्मको वारेन्टि भएका कारण पनि रिसेललाई लिएर त्यत्ति धेरै चिन्ता गर्नुपर्ला जस्तो मलाई लाग्दैन ।