नेपालको जलविद्युतका कारण ईभी बिक्री बढ्दै गएको भारतीय मिडियामा चर्चा

नेपालमा प्रचुर मात्रामा जलविद्युत उत्पादन भइरहेको छ । यसका कारण नेपालमा इलेक्ट्रिक गाडीको बिक्री समेत बढिरहेको भारतीय मिडियाहरुले चर्चा गरेका छन् ।

यसै सन्दर्भमा भारतीय अनलाइन पोर्टल जागरण डटकममा यस सम्बन्धी समाचार सार्वजनिक भउको छ । समाचारमा बिजुलीको प्रचुर स्रोतका कारण नेपालमा द्रुत गतिमा चार्जिङ नेटवर्क पनि विस्तार भइरहेको बताइएको छ ।

विगत दुई वर्षमा ईभीको आयात दोब्बर भएको भन्सार विभागको तथ्यांकले समेत देखाएको छ। नेपाल विद्युत प्राधिकरणका अनुसार नेपालमा विद्युतीय सवारी साधनको प्रयोगले प्रतिवर्ष २ करोड २० लाख अमेरिकी डलरको तेल आयात घटेको छ ।

नेपालमा हाल अधिकतम २ हजार ६०० मेगावाट विद्युत उत्पादन क्षमता रहेको छ र नयाँ जलविद्युत आयोजनाको निर्माण बढ्दै गएको छ । नेपालमा सोलार प्लान्टबाट पनि थोरै मात्रामा बिजुली उत्पादन भइरहेको छ ।

समाचारमा भनिएको छ – नेपालमा इलेक्ट्रिक सवारी साधनको बिक्रीको आधिकारिक तथ्यांक उपलब्ध छैन, तर चिनियाँ कम्पनी बीवाईडीको एट्टो ३ र टाटाको नेक्सन ईभी बिक्रीमा हावी रहेको देखिन्छ । नेपालले जलवायु परिवर्तन उत्सर्जनलाई रोक्न आफ्नो राष्ट्रिय प्रतिबद्धताको रूपमा ईभीको प्रयोगलाई प्रवद्र्धन गरेको छ । सन् २०२५ सम्म सबै अटो बिक्रीको २५ प्रतिशत र सन् २०३० सम्म ९० प्रतिशतमा ईभी बढाउने वाचा गरेको छ ।

नेपालले द्रुत गतिमा चार्जिङ स्टेसन थप्दैछ । विद्युतीय सवारीसाधन चार्ज गर्ने पूर्वाधार विकास विभागका प्रमुख सागरमणि ज्ञवालीले नेपालमा अहिले ४ सय चार्जिङ स्टेसन रहेको र एक वर्षभित्र यो संख्या दोब्बर हुने अपेक्षा गरिएको बताए ।