दक्षिण अफ्रिकी कार बजारमा भारतीय उत्पादनको हिस्सा ५० प्रतिशत

काठमाडौं–दक्षिण अफ्रिकामा बिक्री हुने कुल कारमा भारतिय उत्पादनको हिस्सा ५० प्रतिशत पुगेको छ । मार्केट इन्टेलिजेन्स फर्म लाइटस्टोनको एक रिपोर्ट अनुसार, २०२५ मा दक्षिण अफ्रिकामा बेचिएका लगभग आधा कारहरूमा कुनै न कुनै रूपमा भारतीय कनेक्सन देखिएको हो ।

यी कारहरू या त टाटा र महिन्द्रा जस्ता ब्रान्डका थिए वा विश्वव्यापी अटोमेकरहरूले भारतबाट आयात गरेका थिए । भारतीय ओइएम दक्षिण अफ्रिकी बजारमा प्रमुख खेलाडीहरूको रूपमा उदाउँदै गरेको उक्त तथ्याङ्कले देखाउँछ ।

२०२५ को पहिलो ६ माहीमा प्यासेन्जर कार सेग्मेन्टमा भारतीय ब्रान्डहरूको हिस्सा लगभग ५० प्रतिशत पुगेको छ । पहिलो ५ महिनामा दक्षिण अफ्रिकामा आयात गरिएका सबै यात्रुवाहक सवारी साधनहरूको ४९ प्रतिशत भारतबाट आएको थियो ।

पिकअप रेन्जको बलियो मागका कारण महिन्द्राले पिकअप ट्रक बजारमा प्रभुत्व जमाएको छ । रिपोर्ट अनुसार, २०२४ मा दक्षिण अफ्रिकामा बेचिएका जापानिज ब्रान्डका हलुका सवारी साधनहरूमध्ये ८४ प्रतिशत भारतबाट आयात गरिएका थिए । यसमा टोयोटा स्टारलेट, स्टारलेट क्रस, भिट्ज र अर्बन क्रुजर जस्ता मोडेलहरू समावेश छन्, जुन मारुति सुजुकीको भारत अपरेसनबाट उत्पादन गरिएका हुन् ।

दक्षिण अफ्रिकामा चिनियाँ अटो उत्पादनक हाभल र चेरी जस्ता ब्रान्डले समेत राम्रै बजार पाएका छन् । २०२४ मा चीनबाट आयात गरिएका सवारी साधनहरूले कुल सवारी साधन बिक्रीको ११ प्रतिशत हिस्सा ओगटेको उल्लेख गरिएको छ । जबकि भारतीय आयातको हिस्सा ३६ प्रतिशत थियो भने स्थानीय रूपमा उत्पादित सवारी साधनहरूले कुल बिक्रीको ३७ प्रतिशत ओगटेका थिए ।