भारतीय सेनाले मारुती सुजुकी जिप्सीको सट्टा प्रयोग गर्न थाल्यो जिम्नी

भारतीय सशस्त्र बलले आधिकारिक रूपमा जिप्सीलाई नयाँ मारुती सुजुकी जिम्नी एसयूभीले रिप्लेस गरेको छ । कम्पनीले आधिकारिक रूपमा ६० वटा जिम्नी गाडी इन्डो-तिब्बती सीमा प्रहरीलाई हस्तान्तरण गरेको छ ।

आईटीबीपीले भारतका सबैभन्दा चुनौतीपूर्ण भू-भागमा सञ्चालन गर्छ । जसमा उच्च-उचाइमा रहेका हिमाली क्षेत्र पनि समावेश छ, जहाँ जाडोमा तापक्रम -४५ डिग्री सेल्सियससम्म झर्ने गर्छ । यी क्षेत्रमा हिमनदी, हिउँले ढाकिएका पहाड र उबडखाबड सडक छ । यस्ता दुर्गम ठाउँको लागि बलिया सवारी साधन आवश्यक पर्छ । यी सवारी साधनले आईटीबीपीका कर्मचारीलाई गस्ती, सीमा सुरक्षा र अधिकारी तथा सैनिकको आवागमनमा सहयोग गर्नेछ ।

मारुती सुजुकी जिम्नीको सबैभन्दा ठुलो फाइदा यसको आकार र तौल हो, जसले यसलाई एक सक्षम अफ रोडर बनाउँछ । जिम्नीमा १.५-लिटर पेट्रोल इन्जिन छ जसले १०३ बीएचपी र १३४ एनएम टर्क उत्पादन गर्छ ।  यसको इन्जिन म्यानुअल वा अटोमेटिक टर्क कन्भर्टर गियरबक्ससँग जोडिएको छ ।

जिम्नीमा फोर ह्विल ड्राइभ सिस्टम छ जसले यसलाई कुनै पनि प्रकारको भूभागको सामना गर्न मद्दत गर्छ । जिम्नीको ह्विलमा पावरको लागि ब्रेक असिस्टेड लिमिटेड स्लिप डिफरेन्शियल जडान गरिएको छ । यसको मूल्य १२ लाख ७५ हजार भारु छ ।