२०३० सम्ममा विश्वको सबैभन्दा ठूलो ईभी उत्पादक बन्ने भारतको महत्वकांक्षा

विश्वको तेस्रो ठूलो अटो बजार भारत अव ईभी उत्पादनमा समेत आक्रमक बन्ने भएको छ । भारत सरकारले सन् २०३० सम्ममा विश्वको सबैभन्दा ठूलो ईभी उत्पादक बन्ने महत्वकांक्षी लक्ष्य लिएको हो ।

भारत सरकारको सडक यातायात तथा राजमार्ग मन्त्री नितिन गडकरीले भारत २०३० सम्ममा विश्वको सबैभन्दा ठूलो विद्युतीय सवारी साधन उत्पादक बन्ने तय भएको बताएका छन् ।

‘जब हाम्रो सरकार २०१४ मा सत्तामा आयो, मैले विद्युतीय सवारी साधनको बारेमा कुरा गरेको थिएँ । त्यतिबेला कसैले विश्वास गरेनन्, तर आज यो वास्तविकता हो’, गडकरीले भने ।

‘त्यतिबेला भारतीय अटोमोटिभ उद्योगको मूल्य १४ लाख करोड रुपैयाँ थियो । हालसालै, यो बढेर २२ लाख करोड रुपैयाँ पुगेको छ । जसले जापानलाई उछिन्दै अमेरिका र चीन पछि विश्वको तेस्रो ठूलो अटोमोबाइल बजार बनेको छ’ मन्त्रीले भने, ‘अब, हामीले २०३० सम्ममा विश्वको विद्युतीय सवारी साधनको नम्बर १ निर्माता बन्ने लक्ष्य राखेका छौं ।’

ब्याट्री प्रविधि द्रुत गतिमा विकसित भइरहेको र लिथियम–आयन ब्याट्रीहरू सस्तो हुँदै जाँदा विद्युतीय सवारी साधनहरूको लोकप्रियता बढ्दै जाने विश्वास गडकरीको छ ।