२०३० सम्ममा २६ नयाँ मोडल ल्याउने हुन्डाईको तयारी, कुन–कुन आउँदै ?

काठमाडौं–हुन्डाईले २०३० सम्ममा भारतिय बजारका लागि २६ नयाँ मोडेलहरू लाइनमा राखेको छ । यसमा इन्ट्रि लेभल ह्याचब्याकदेखि प्रिमियम हाइब्रिड एसयूभी र स्केटबोर्डमा आधारित ईभीसम्म समावेश छन् ।

मिडिया रिपोर्टका अनुसार, यी २६ मोडलमध्ये, ७ देखी ८ वटासम्म अल न्यू मोडल छन् भने बाँकी हाल बिक्री हुँदै आएका मोडलको नयाँ भेरियन्ट र फेसलिफ्ट हुन् ।

हुन्डाईले यसै वर्षको अक्टोबरमा भेन्यूको नयाँ जेनेरेशन लन्च गर्ने तयारी गरिरहेको छ । त्यसपछि २०२६ को मध्यतिर अर्को नयाँ क्रसओभरलाई उसले वेयोन नाम दिएर ल्याउनेछ । आई २० को प्लेटफर्ममम निर्माण हुने अनुमान गरिएको यस एसयुभी क्रेटा भन्दा तल रहने अपेक्षा गरिएको छ ।

यसैगरी, एक्स्टर फेसलिफ्ट र अपडेटेड भर्ना अप्रिल २०२६ सम्ममा बजारमा आउने अनुमान गरिएको छ । आई२० र अल्काजारको नयाँ जेनेरेशन २०२८ भित्र लन्च हुनेछ । हुन्डाईले २०२६ को अन्त्यसम्ममा मास–मार्केट इलेक्ट्रिक ह्याचब्याक प्रस्तुत गर्ने योजना बनाएको छ ।

स्केटबोर्ड प्लेटफर्ममा आधारित पहिलो मास–मार्केट ईभीको मूल्य १० देखी १५ लाख भारुको विचमा रहने र यसले टाटा पन्चसंग प्रतिस्पर्धा गर्ने जनाइएको छ । यी बाहेक कम्पनीले ४०० भोल्ट आर्किटेक्चरमा आधारित एक नयाँ मिड साइज इलेक्ट्रिक एसयुभी पनि लन्च गर्ने योजना बनाएको छ ।

आफ्नो पहिलो हाइब्रिड मोडलका रुपमा प्यालिसेडलाई उतार्ने तयारी गरिरहेको हुन्डाईले २०२८ भित्रै क्रेटाको नयाँ जेनेरेशन र हाइब्रिड भर्सन समेत लन्च गर्ने तयारी गरेको छ ।