१.२ लिटर क्षमताको नयाँ टर्बो–पेट्रोल इन्जिन विकास गर्दै हुन्डाई

हुन्डाईले भारतिय बजारकै लागि भनेर नयाँ इन्जिन विकास गर्ने भएको छ । सो नयाँ ईन्जिन १.२ लिटर क्षमताको डाइरेक्ट–इन्जेक्शन टर्बो–पेट्रोल रहने बताइएको छ ।

सोहि इन्जिनलाई हुन्डाईले भविषयमा हाइब्रिड र कम्प्याक्ट क्रसओभरमा समेत प्रयोग गर्ने योजना बनाएको छ । नयाँ इन्जिन जडित मोडल २०२६ मै लन्च हुने अपेक्षा गरिएको छ ।

सो नयाँ इन्जिनले १.० लिटर टर्बो–पेट्रोल इन्जिन भन्दा बढी टर्क र राम्रो ड्राइभेबिलिटी प्रदान गर्ने बताईएको छ । नयाँ इन्जिन क्रेटा लगायत एसयुभीमा प्रयोग भइरहेको हालको १.५ लिटर युनिट भन्दा बढी कम्प्याक्ट र इन्धन किफायति हुनेछ । यसलाई ई–सिभिटी अर्थात डुअल क्लच स्वचालित ट्रान्समिसनसँग जोड्न सकिन्छ ।

सो नयाँ इन्जिन पूर्ण रुपमा विकास भइसकेपछि यसलाई नयाँ पुष्ताको क्रेटा, भेन्यू र आई२० लगायत मोडलमा समेत प्रयोग गर्न सकिने अनुमान गरिएको छ ।

रिपोर्टका अनुसार नयाँ इन्जिन मारुति सुजुकीको जेड१२ई युनिटको प्रतिक्रियामा विकास गर्न लागिएको हो । सुजुकीको जेड१२ई मा ३ सिलिन्डर ब्लक राखिएको छ भने हुन्डाइको सो नयाँ इन्जिनमा ४ वटा सिलिन्डर हुनेछ ।

नयाँ ईन्जिनलाई पूर्ण रुपमा भारतमै निर्माण गरिने हुँदा यसको लागत कम पर्ने जनाइएको छ । लागत कम गर्न स्थानीय कम्पोनेन्टहरुको प्रयोगलाई बढवा दिइनेछ ।