क्रेटा इलेक्ट्रिकको तीन नयाँ भेरिएन्ट सार्वजनिक, फिचर र रेन्ज पनि बढ्यो

हुन्डाईले भारतामा क्रेटा इलेक्ट्रिकको तीन नयाँ भेरिएन्ट लन्च गरेको छ । एसयुभी अव ४२ किलोवाट आवर ब्याट्री प्याकमा एक्सिलेन्स, टेक ४२ किलोवाट आवर र एक्जिक्युटिभ (ओ) ५१.४ किलोवाट आवर भेरिएन्टमा उपलब्ध हुने जनाइएको छ ।

साथै, यस विद्युतीय एसयूभीको सबै भेरिएन्टमा अव वायरलेस एन्ड्रोइड अटो र एप्पल कारप्ले तथा ड्यासक्याम र रियर वायरलेस चार्जर स्ट्यान्डर्ड फिचरका रुपमा उपलब्ध हुनेछ ।

नयाँ एक्सिलेन्स भेरिएन्टमा ८ तरिकाले एडजस्ट गर्न मिल्ने भेन्टिलेटेड फ्रन्ट सिट, ड्राइभर सिटमा मेमोरी तथा वेलकम रिट्र्याक्ट फंक्शन र यात्रु सिटको लागि वाक–इन उपकरण जस्ता सुविधा उपलब्ध गराइएको छ ।

यसमा रियर वायरलेस चार्जर, आईटी डिभाइस होल्डर र रिट्र्याक्टेबल कपहोल्डर भएको फोल्डेबल सिटब्याक टेबल, टेलिमेटिक्स स्विच भएको इलेक्ट्रोक्रोमिक मिरर, लेभल २ एडास, ब्लाइन्ड–स्पट भ्यू मनिटर भएको ३६०–डिग्री क्यामेरा र रेन सेन्सिङ वाइपर पाउन सकिन्छ ।

एक्जिक्युटिभ टेक भेरिएन्टमा भ्वाइस–सक्षम स्मार्ट प्यानोरामिक सनरुफ, भेन्टिलेटेड फ्रन्ट सिट, वायरलेस एन्ड्रोइड अटो तथा एप्पल कारप्ले र रियर विन्डो सनशेड दिइएको छ ।

त्यसैगरी, हुन्डाईले ५१.४ किलोवाट आवर ब्याट्री प्याकमा एक्जिक्युटिभ (ओ) लाई एन्ट्री–लेभल भेरिएन्टमा ल्याएको छ । यसमा भ्वाइस–सक्षम स्मार्ट प्यानोरामिक सनरुफ र वायरलेस एन्ड्रोइड अटो तथा एप्पल कारप्ले लगायतका अन्य फिचर थप गरिएको छ ।

नयाँ भेरिएन्टको आगमनसंगै यसअघि दाबी गरिएको रेन्जमा समेत बृद्धि भएको कम्पनीले जनाएको छ । ४२ किलोवाट भर्सनले यसअघि ३९० किलोमिटर रेन्ज दिने दाबी गरिएकोमा अव ४२० किलोमिटर दिने बताइएको छ भने ५१.४ किलोवाट आवर भर्सनको ४७३ किलोमिटरबाट बढेर ५१० किलोमिटर पुगेको दाबी गरिएको छ ।

क्रेटा इलेक्ट्रिक नेपाली बजारमा समेत उपलब्ध रहँदै आएको एक चर्चित एसयूभी हो । नेपालमा यसको ४२ किलोवाट आवर भर्सन ४ वटा भेरिएन्टमा उपलब्ध छ । जसको मूल्य ५१ लाख ९६ हजारदेखी ५९ लाख ९६ हजार रुपैयाँसम्म निर्धारण गरिएको छ ।