३ लाख फरक मूल्यमा हुन्डाईको इलेक्ट्रिक कार कोना र कोना फेसलिफ्ट : यस्ता छन् ८ फरक

नेपाली बजारमा केही समय पहिले हुन्डाईको इलेक्ट्रिक कार कोना फेसलिफ्ट भित्रिएको छ । यो भन्दा पहिले देखि नै नेपाली बजारमा हुन्डाई कोना बिक्री भइरहेको थियो ।

पहिले देखि नै बिक्री भइरहेको हुन्डाई कोनाको मूल्य ५६ लाख ९६ हजार रुपैयाँ र नयाँ फेसलिफ्ट कोनाको मूल्य ५९ लाख ९६ हजार रुपैयाँ तोकिएको छ । फेसलिफ्ट कोना हेर्दा पहिलेको कोना भन्दा आकर्षक देखिनुका साथै यसमा विभिन्न प्रकारका फरक फिचर समेत उपलब्ध छन् ।

पहिलेको कोनामा फरक प्रकारको टेक्स्चर थियो भने अहिले प्लेन खाले छ । यसले गाडीलाई प्रिमियम अनुभूति दिएको छ ।

यसमा थ्री लेयर्ड अर्थात तीन लेयरको एलईडी हेडलाइट छ । लो बिम गर्दा थोरै र हाई बिम गर्दा तीनवटै लाइट बल्ने गर्छ । यसले गाडीको लुक्सलाई अझै आकर्षक बनाएको छ ।

यसको ग्रिल प्लेन खालेको छ । यसमा सिल्भर लाइनिङ दिइएको छ । यस प्रकारको लाइनिङका कारण लुक्समा निखारता आएको छ ।

पहिले नभएको र अहिले भएको एउटा महत्वपूर्ण फिचर सनरुफ हो । हुन्डाईले पछिल्लो समयमा सबै गाडीमा दिन थालेको सनरुफको सुविधा हुन्डाई कोनामा समेत उपलब्ध गराएको छ ।

पहिले १०० र १५० किलोवाट क्षमताको मोटर उपलब्ध हुन्डाई कोना उपलब्ध थियो भने अहिले एउटा मात्र १०० किलोवाट क्षमताको कोना उपलब्ध छ ।

ह्विलको बनावट पनि पहिले भन्दा फरक र आकर्षक छ । यो अझै बढी एरोडाइनामिक्स डिजाइनमा उपलब्ध छ ।

पहिले ७ इन्चको टचस्क्रिन इन्फोटेनमेन्ट सिस्टम भएकोमा अहिले ८ इन्चको उपलब्ध छ । पहिले एनालग क्लस्टर भएकोमा अहिले १०.२५ इन्चको डिजिटल इन्स्ट्रयुमेन्ट क्लस्टर उपलब्ध छ ।

पछिल्लो भागमा रहेको बम्परमा पनि सिल्भर क्रोम फिनिसिङ उपलब्ध छ । त्यसैगरी रियर एलईडी टेलल्याम्प पनि पहिले भन्दा फरक आएको छ । फाइन ट्युनिङ भएर आएको छ ।

यस्ता फरक भए पनि अन्य फिचर भने दुवै गाडीमा उही छन् । दुवैमा लेदर सिट, पावर सिट, हिटेड सिट, भेन्टिलेटेड सिट आदि सबै छ । त्यसैगरी सुरक्षाका लागि विभिन्न प्रकारका एयरब्याग उपलब्ध छन् । पुस बटन स्टार्टलगायतका विभिन्न फिचर समेत उपलब्ध छन् ।

हुन्डाई कोना फेसलिफ्टमा १०० किलोवाट मोटर र ३९.२ किलोवाट आवर क्षमताको ब्याट्री अप्सन छ । यसले सिंगल चार्जमा ३१२ किलोमिटरको रेन्ज दिन्छ ।