नेपाल भित्रिने तयारीमा रहेको हुन्डाई एक्सटरले जित्यो इन्डियन कार अफ द इयर अवार्ड

भारतको प्रतिष्ठित इन्डियन कार अफ द इयर (आईकोटी) को विजेता हुन्डाई एक्सटर बनेको छ ।

हुन्डाई एक्सटरले मारुती सुजुकी जिम्नी, होन्डा एलिभेट र टोयोटा इनोभा हाइक्रसलाई पछि पार्दै सो अवार्ड हात पारेको हो । प्रतिस्पर्धामा यो वर्ष लन्च भएका सिट्रोन सी३ एयरक्रस, हुन्डाई भरना, महिन्द्रा एक्सयूभी ४०० र एमजी कोमेट लगायतका सवारी साधन संलग्न थिए ।

त्यसैगरी बीएमडब्ल्यु ७ सिरिजले प्रिमियम कार अफ द इयर अवार्ड पाएको छ भने हुन्डाई आयोनिक ५ ले ग्रिन कार अफ द इयर अवार्ड पाएको छ ।

अटोमोबाइलसँग सम्बद्ध व्यावसायिक पत्रकारहरु संलग्न जुरीद्वारा छनोट गरिने यो अवार्ड प्रतिष्ठित मानिन्छ ।

नेपाली बजारमा हुन्डाई एक्सटर भने बिक्रीका लागि उपलब्ध भइसकेको छैन । गत भदौमा सम्पन्न नाडा अटो शोमा नेपालका लागि आधिकारिक वितरक लक्ष्मी इन्टरकन्टिनेन्टल प्रालिले सो गाडी प्रदर्शन गरेको थियो र बुकिङ पनि प्रारम्भ गरेको थियो ।

आगामी नयाँ वर्ष २०२४ पश्चात यो गाडी पनि नेपाली बजारमा उपलब्ध हुने कम्पनीको भनाइ छ ।