नेपाल आइपुग्यो हुन्डाई आयोनिक ५ : केही दिनमै औपचारिक बिक्री गरिने

काठमाडौं – हुन्डाईको बहुप्रतीक्षित इलेक्ट्रिक कार नेपालमा आइपुगेको छ । यो कार टोइङमार्फत ल्याइरहेको अवस्थामा नेपाली सडकमा देखिएका तस्बिर अहिले चर्चामा छन् ।

हुन्डाईको अल–न्यु बोल्ड, युनिक र डाइनामिक आयोनिक ५ ले नेपाली बजारमा एउटा नयाँ पहिचान कायम गर्ने कम्पनीले विश्वास गरेको बताइएको छ ।

आयोनिक ५ ले सन् २०२१ को टप गियर इलेक्ट्रिक अवार्ड जितेको थियो। यो हुन्डाईको नयाँ आयोनिक लाइन अपको पहिलो कार हो भने ई–जीएमपी ब्याट्री इलेक्ट्रिक भेइकल प्लेटफर्ममा बनाइएको पहिलो कार समेत हो ।

पर्फमेन्स, इफिसियन्सीर कम्फर्टका लागि यसमा सबै प्रविधिको प्रयोग गरिएको बताइएको छ । यसमा भएका रियर ह्विल ड्राइभ, सोलार एन्ड भिजन रुफ, भेइकल टु लोड (भीटुएल) फिचर, एम्बिएन्ट मुड लाइट, पावर टेलगेट, रेन सेन्सिङ वाइपर, ब्लाइन्ड स्पट भ्यु मोनिटर र भ्वाइस रिकग्निसन भेइकल कन्ट्रोल जस्ता फिचरले यसलाई थप आकर्षक बनाउने छ ।

हुन्डाई आयोनिक ५ इलेक्ट्रिक ग्लोबल मोडुलर प्लेटफर्म (ई–जीएमपी) मा बनाइएको इलेक्ट्रिक कार हो । यो ५८ र ७२.६ किलोवाट आवर गरी दुई ब्याट्री प्याक अप्सन तथा अल ह्विल र रियर ह्विल ड्राइभमा उपलब्ध हुन्छ । रियर ह्विल ड्राइभ र ७२.६ किलोवाट आवर भर्सनले सिंगल चार्जमा ४८१ किलोमिटर रेन्ज दिन्छ । दुवै ब्याट्री प्याक अप्सनलाई १८ मिनेटमै १० देखि ८० प्रतिशत सम्म चार्ज गर्न सकिन्छ ।

नेपाली बजारमा उपलब्ध भर्सन र यसको मूल्यको वारेमा कम्पनीले केही जानकारी दिएको छैन । सम्भवतः कम्पनीले केही दिनभित्रै यसको औपचारिक लन्चिङका साथ सबै फिचरको जानकारी दिने अनुमान गर्न सकिन्छ ।