रोयल इन्फिल्ड बाइकको मूल्यमा भारी गिरावट : एक महिना नपुग्दै मूल्य परिमार्जन

नेपाली बजारमा उपलब्ध रोयल इन्फिल्ड मोटरसाइकलको मूल्यमा भारी मात्रामा कमी गरिएको छ । नेपालका लागि आधिकारिक वितरक अल्फा अटोमोटिभ्सले करिव एक महिना पहिले मूल्य सार्वजनिक गरेकोमा हाल फेरि यसमा परिमार्जन गरेको हो ।

अल्फा अटोमोटिभ्सले सार्वजनिक गरिएको मूल्य सूची अनुसार क्लासिक ३५० ब्ल्याकको मूल्य ६ लाख ४० हजार रुपैयाँ र ब्याटल ग्रिन, गन ग्रे, रेडिच रेड र एसको मूल्य ६ लाख ५० हजार रुपैयाँ तोकिएको छ । यो भन्दा पहिले यी सबै कलर मोडलको मूल्य ७ लाख रुपैयाँ रहेको थियो ।

त्यसैगरी मेटियर ३५० फायरबल सबै कलर भेरिएन्टको मूल्य ८ लाख ३० हजार, मेटियर स्टेलरका सबै कलरको मूल्य ८ लाख ५० हजार र मेटियर सुपरनोभाका सबै कलरको मूल्य ८ लाख ७० हजार रुपैयाँ तोकिएको छ ।

यो भन्दा पहिले विभिन्न कलर अप्सनमा उपलब्ध मेटियर ३५० को मूल्य ८ लाख ७५ हजार देखि ९ लाख ३५ हजार रुपैयाँ सम्म तोकिएको थियो ।

हालै बजेटमार्फत सरकारले २०० सीसी भन्दा बढी क्षमताका मोटरसाइकलको मूल्य बढाए पछि रोयल इन्फिल्डको मूल्य पनि त्यसै अनुसार बढेको बताइएको थियो ।

हाल बिक्रीका लागि उपलब्ध रोयल इन्फिल्डका सबै मोटरसाइकल ३५० सीसीका छन् । बजेट अनुसार सरकारले अहिले २५० देखि ४०० सीसीसम्मको मोटरसाइकलमा ७० प्रतिशत भन्सार र ८० प्रतिशत अन्तःशुल्क लगाएको छ । यसअघि ३० प्रतिशत मात्रै भन्सार लाग्ने गरेकोमा हाल भन्सार शुल्क नै ७० प्रतिशत पुगेको हो ।

पहिले विवेक अटोमोबाइल्सले रोयल इन्फिल्डका मोटरसाइकल बिक्री गर्ने गरेकोमा हालै मात्र अल्फा अटोमोटिभ्स नयाँ वितरक नियुक्त भएको हो ।