चर्चामा हुवावेको ३ हजार किलोमिटर रेन्ज र ५ मिनेटमै चार्ज हुने नयाँ ईभी ब्याट्री प्रविधि

हुवावेले इलेक्ट्रिक सवारी साधनको लागि नयाँ ब्याट्री प्रविधिमा पेटेन्ट दर्ता गराएको छ, जसले एक पटकको पूर्ण चार्जमा ३ हजार किलोमिटरसम्मको दूरी तय गर्न सक्छ। सो ब्याट्रीलाई ० देखि १०० प्रतिशतसम्म चार्ज गर्न जम्मा पाँच मिनेट मात्र लाग्छ।

हुवावेको सो नयाँ प्रविधि सोलिड स्टेट ब्याट्री सिस्टममा आधारित छ, जुन परम्परागत लिथियम-आयन ब्याट्रीको तुलनामा धेरै गुणा बढी ऊर्जा घनत्व र चार्जिङ गति राख्छ। यस ब्याट्रीमा नाइट्रोजन डोपेड सल्फाइड इलेक्ट्रोड प्रयोग गरिएको छ, जसले दीर्घकालीन प्रयोगमा क्षमता घट्ने समस्यालाई कम गर्न मद्दत पुर्‍याउने बताइएको छ। कम्पनीका अनुसार यसमा ४०० देखि ५०० किलोवाट-घण्टा प्रति किलोग्रामको ऊर्जा घनत्व हुन सक्छ, जुन हालको लिथियम-आयन ब्याट्रीभन्दा झन्डै तीन गुणा बढी हो।

तथापि सो अनुमान चीनको सीएलटीसी परीक्षणमा आधारित भएकोले व्यावहारिक अवस्थामा यसको प्रदर्शन अलिक भिन्न हुन सक्छ। यदि अमेरिकाको ईपीए मापदण्डअनुसार परीक्षण गरियो भने, सम्भावित रेन्ज २ हजार किलोमिटरमा झर्नेछ। यद्यपि सो रेन्ज पनि हालका अधिकांश ईभीको तुलनामा निकै अगाडि हुनेछ।

सो ब्याट्रीको तौल सानो कारकै जतिको हुन सक्ने अनुमान गरिएको छ, जसले सवारीको लागत, दक्षता र डिजाइनमा असर पार्न सक्छ। विशेषज्ञहरूका अनुसार सो प्रविधिको व्यावहारिक प्रयोग त्यतिबेला सफल हुनेछ जब यसलाई प्रयोग गरेर साना, हल्का र किफायती ब्याट्री विकास गरिन्छ ।

यद्यपि सोलिड स्टेट ब्याट्रीलाई लामो समयदेखि गेम चेन्जर भनिँदै आइएको छ, यसको ठूलो मात्रामा उत्पादन र किफायती मूल्यमा उपलब्धता अझै चुनौतीको विषय हो।