हुवावे र जिएसी मिलेर ल्याए प्रिमियम बिद्युतिय कार, रोल्स रोयसलाई टक्कर दिने

चिनियाँ प्रविधि कम्पनी हुवावेले जीएससीसंग सहकार्य गरी नयाँ प्रिमियम कार सार्वजनिक गरेको छ । कम्पनीले बहु प्रतीक्षित बिद्युतिय कार मइस्ट्रो एस ८०० ईभी सार्वजनिक गरेको हो ।

चिनका दुई ठूला ब्रान्ड मिलेर बनाएको सो नयाँ कारले लक्जरी ब्रान्ड रोल्स रोयस र मर्सिडिज मेब्याकसँग प्रतिस्पर्धा गर्ने बताइएको छ ।

मिडिया रिपोर्टका अनुसार एस ८०० हार्मोनी इन्टेलिजेन्ट मोबिलिटी अलायन्स अन्तर्गतको सबैभन्दा महँगो मोडेल हो । यसको मूल्य १० लाखदेखि १५ लाख युआन (करिब एक करोड ८६ लाखदेखि दुई करोड ७९ लाख रुपैयाँ) हुने बताइएको छ । यो गाडी अहिले अग्रिम–बिक्रीका लागि खुला भइसकेको छ ।

सो नयाँ कार ५,४८० एमएम लामो, २,००० एमएम चौडा, १५३६ एमएम अग्लो छ भने ह्विलबेस ३,३७० एमएम छ । यो मोडेल लेभल थ्री इन्टेलिजेन्ट ड्राइभिङ आर्किटेक्चर अन्तर्गत डिजाइन गरिएको हो । ह्वावेको दोस्रो पुस्ताको ट्युलिङ इन्टेलिजेन्ट च्यासिसमा निर्माण भएको यो नै पहिलो मोडेल हो ।

कम्पनीले यस मोडेलका विस्तृत विवरणहरू अझै सार्वजनिक गरिसकेको छैन । बजारमा औपचारिक रूपमा कहिले सार्वजनिक हुन्छ भन्ने मिति पनि खुलाइको छैन ।