कस्तो रहला इभी एक्सपो-२०२२, २ दर्जन बढी व्रान्ड सहभागी हुने अनुमान

नाडा अटोमोवाइल एसोसिएसन अफ नेपालले पहिलो पटक इभी एक्सपो आयोजना गर्न लागिरहेको छ । असोज ६ देखी ९ गतेसम्म राजधानीको भृकुटीमण्डपमा अयोजना हुने यो एक्सपोलाई इभी पारखीले चासोका साथ हेरिरहेका छन् । एक्सपोमा २ दर्जन बढी टु ह्विलर एवं फोर ह्विलर ब्रान्डले सहभागीता जनाउने नाडाको अपेक्षा छ ।

फेस्टिवल सिजनलाई उन्मुख पारेर हरेक वर्ष अटो शो आयोजना गर्दै आइरहेको नाडाले यसपटक उक्त शो आयोजना गर्न नसक्ने परिस्थिती सिर्जना भएपछि यसको विकल्पमा इभी एक्सपो अयोजना गर्न लागेको हो । एक्सपोमा विद्युतिय कार, स्कुटर एवं मोटरसाइकल, थ्रि ह्विलर र कमर्सिय भेइकलले समेत सहभागीता जनाउने उसको अपेक्षा छ ।

पछिल्लो २ वर्षयता नेपालमा इलेक्ट्रिक भेइकलको माग र खपत दुवै वृद्धि भैरहेको छ । यस्ता साधनमा ग्राहकले रुची बढाउँदै लगेपछि आयतकर्ता कम्पनीले नयाँ नयाँ ब्रान्डलाई नेपाल भित्राउने क्रम समेत बढाइरहेका छन् । ग्राहकको रोजाइमा पर्न सफल कतिपय इभी ब्रान्डको माग वमोजिम आपूर्ती हुन नसकेका कारण अभावको अवस्था समेत झेल्नु परिरहेको छ ।

अर्कोतर्फ वैंक ताथा वित्तिय संस्थाले अटोलोनमा कडाई गरेका कारण सजिलै गाडी किन्न सकिने अबस्था समेत रहेको पाइदैन भने व्याजदर समेत निकै उच्च भैसकेको अबस्था छ । यस्तो परिस्थितीका कारण समग्र अटोमोवाइल वजार नै अहिले मन्दिको अबस्थाबाट गुज्रिनु परेको छ । यसका वाजजुत पनि नाडाले समग्र इलेक्ट्रिक भेइकललाई समेटी छुट्टै इभी एक्सपो आयोजना गर्दा यसले बजार र इभी पारखी दुवै पक्षलाई सकरात्मक सन्देश भने दिएको छ ।

यो एक्सपोमा नाडाले धेरैभन्दा धेरै ब्रान्डका इलेक्ट्रिक भेइकल एवं सोसंग जोडिएर आउने अन्य कम्पोनेन्टलाई समेत सहभागी गराउने योजना बनाएको छ । संघका अध्यक्ष ध्रुव थापाका अनुसार नेपाली बजारमा अहिले २६ ब्रान्डका टु ह्विलर र १२ ब्रान्डका फोर ह्विलर इभी बिक्री भैरहेका छन् । यी सवै ब्रान्डलाई सहभागी गराउन आफूहरुले पहल गरिरहेको उनले बताए । उनी भन्छन् ‘हाम्रो पहल सकेसम्म सवै ब्रान्डलाई सहभागी गराउने नै हो । यद्यपी केही व्रान्ड सहभागी नहुँदा पनि २ दर्जन बढी सहभागी हुने सुनिश्चित जस्तै देखिएको छ ।’

नाडाले पहिलोपटक यसप्रकारको एक्सपो अयोजना गर्न लागेका कारण ब्रान्डको संख्यासंगै दर्शकको उल्लेख्य सहभागितामा समेत जोड दिने उनले बताए । ‘बजारमा अहिले इभीको चर्चा जुन रुपमा चुलिँदै गएको छ, यस हिसावले पनि यो एक्सपोमा दर्शकहरुको सहभागिता उल्लेख्य हुने हामीले विश्वास लिएका छौ’ नेपाल अटोसंग उनले भने ।

मेलामा हुन्डाई, टाटा, निशान, विवाइडी, नेटा, टेस्ला, ग्रेटवाल ओरा, किया, एमजी, सिटी स्पिरिट, दिगो र डेरी लगायत अन्य बाँकी केही फोर ह्विलर ब्रान्ड सहभागी हुनसक्ने आँकलन गरिएको छ । यसैगरी टु ह्विलरमा प्योर इभी, लेभनिङ, सुपरसोको, ओकिनावा, टेलजी, दुहान, निउ, याडिया, कोमाकी, राफ्ट र वेला सहित नेपाली ब्रान्ड यात्रीले लगायतले सहभागिता जनाउने अनुमान गरिएको छ । एक्सपोमा सहभागी हुन भदौ १ देखी ५ गतेसम्म स्टल वुकिङ गराइसक्नु पर्ने नाडाले जनाएको छ ।