तपाईको सवारी साधनको गति कति ? बढी गतिमा चलाए यस्तो छ कानुनी व्यवस्था

तपाईले चलाउने मोटरसाइकल, स्कुटर वा अन्य सवारी साधनको गति कति हुनुपर्छ भन्ने कुरा थाहा छ कि छैन ? सवारी तथा यातायात व्यवस्था ऐन २०४९ र सवारी तथा यातायात व्यवस्था नियमावली २०५४ मा यस सम्बन्धी व्यवस्था गरिएको छ ।

यस अनुसार कार, जिप, भ्यान र पिकअपको गति बढीमा ८० किलोमिटर प्रतिघण्टा हुनुपर्छ । त्यसैगरी टेम्पो, स्कुटर, पावर टिलर तथा ट्रयाक्टरको गति बढीमा ४० किलोमिटर प्रतिघण्टा हुनुपर्छ ।

त्यसैगरी मोटरसाइकलको गति बढीमा ५० किलोमिटर प्रतिघण्टा हुनुपर्छ । बस, मिनीबस, ट्रक, मिनी ट्रकको गति पहाडी बाटोमा बढीमा ५० र समतल बाटोमा बढीमा ७० किलोमिटर प्रतिघण्टा हुनुपर्छ ।

तर बाक्लो वस्ती भएको इलाकामा प्रतिघण्टा ४० किलोमिटर भन्दा बढी गतिमा कुनै पनि सवारी चलाउन पाइदैन ।

यातायात व्यवस्था विभागले यस्ता सवारी वाहेक अन्य सवारीको गति निर्धारण गर्न र गति निर्धारण गरिएका सवारीको हकमा भौगोलिक अवस्था र सडकको स्थिति समेत विचार गरी सवारीको गतिमा फेरबदल गर्न सक्ने छ ।

यसैगरी कुनै स्थानमा सवारीको गति सम्बन्धी सूचना वा संकेत उल्लेख गरिएको रहेछ भने त्यस्तो स्थानमा सोही सूचना वा संकेतमा उल्लेख भए बमोजिम सवारी चलाउनु पर्नेछ ।

दमकल, एम्बुलेन्स तथा विरामी लैजाने कामको सिलसिलामा चलाइएको सवारीको हकमा गति तोकिएको छैन । तर त्यस्तो सवारीले सडकमा हिड्ने बटुवा तथा अन्य सवारीलाई सचेत गर्नको निम्ति विशेष किसिमको ध्वनी तथा बत्तीको प्रयोग गर्नुपर्छ ।

जरिवाना
गति निर्धारण गरिएको स्थानमा सो निर्धारित गतिभन्दा बढी वेगले सवारी चलाएमा यातायात व्यवस्था कार्यालयमार्फत १ हजार रुपैयाँ जरिवाना गर्न सक्ने व्यवस्था छ । ट्राफिक प्रहरीमार्फत यस्तो जरिवाना गरिने व्यवस्था छ ।