३ मिनेटमा रिफिल भई १ हजार किमीसम्म रेन्ज दिने नयाँ हाइड्रोजन ईभी सार्वजनिक

पेरिस मोटर शोमा विश्वभरका कार कम्पनीहरूले नयाँ सवारी साधन निरन्तर सार्वजनिक गरिरहेका छन् । उक्त शोमा होपियम मशिना नामको हाइड्रोजन इलेक्ट्रिक कार पनि प्रदर्शनमा राखिएको छ । भविष्यको टेक्नोलोजी जोडिएको सो कारले सबैको ध्यानाकर्षण गरिएको छ ।

होपियम मशिना लक्जरी सेडान कार जस्तै हो । यो पूर्णतया हाइड्रोजन र इलेक्ट्रिक कार हो । आकर्षक डिजाइन भएको सो कारको अगाडि एलईडी डीआरएल र लाइट दिइएको छ ।

कारको इन्टेरियर पनि एक्सटेरियर जस्तै आकर्षक डिजाइन गरिएको छ । कारको इन्टेरियरको थिम ब्ल्याक राखिएको छ ।

यो कारमा ५०० एचपीको शक्तिशाली मोटर जडान गरिएको छ । सो हाइड्रोजन इलेक्ट्रिक कार २३० किलोमिटर प्रतिघण्टाको उच्च गतिमा चलाउन सकिन्छ । यसलाई ५ सेकेन्डमा ० बाट १०० किलोमिटरसम्म लैजान सकिन्छ ।

सो कारको सबैभन्दा ठूलो विशेषता भनेको यसमा हाइड्रोजन रिफिल गर्न ३ मिनेट मात्र लाग्छ । त्यसपछि यसले १ हजार किलोमिटरको रेन्ज दिन्छ । कारमा इलेक्ट्रिसिटी स्टोरको लागि हाइड्रोजनको साथै साना ब्याट्री पनि राखिएको छ ।

अन्तर्राष्ट्रिय बजारमा कम्पनीले यसको बुकिङ पनि सुरु गरिसकेको छ । सो कारको लागि ६५ हजार ६०० युरोमा बुक गर्न सकिन्छ । सो कारको मूल्य १ लाख १८ हजार १३४ युरो तोकिएको छ । कार बुक गरेर रद्द गर्नु परेमा कम्पनीले कुनै पनि शुल्क नलिई सम्पूर्ण बुकिङ रकम फिर्ता गर्नेछ ।

मिडिया रिपोर्टका अनुसार यसको डेलिभरी सन् २०२५ देखि सुरु हुने अपेक्षा गरिएको छ ।