१५० सीसीको डर्ट बाइक : १ लाख रुपैयाँ मूल्य बढ्दा पनि नेपाली बजारमा अभाव

काठमाडौं – होन्डाका धेरै मोडलका मोटरसाइकल नेपाली बजारमा लोकप्रिय छन् । ती मध्ये पनि एक्सआर १५०एल मोटरसाइलको अन्य भन्दा फरक प्रकारको लोकप्रियता कायम छ ।

नेपाली बजारमा उपलब्ध भएको करिव १५ दिनमै यो मोटरसाइकलको स्टक सकिएको छ । यति मात्र होइन, पहिले भन्दा यसको मूल्य १ लाख रुपैयाँले बढ्दा समेत मूल्य वृद्धिको असर यसमा केही पनि देखिएन । राइडरहरुले धमाधम यो मोटरसाइकल डेलिभरी लिने गरेका छन् भने अहिले किन्न चाहनेका लागि यो मोटरसाइकल नेपाली बजारमा उपलब्ध छैन । अब किन्न चाहनेहरुले फेरि बुकिङ गर्नु पर्ने भएको छ ।

स्याकार ट्रेडिङ कम्पनीले नेपाली बजारमा बिक्री–वितरण गरिरहेको यो मोटरसाइकलको मूल्य हाल ६ लाख ४९ हजार ९ सय रुपैयाँ छ । १५ दिन पहिले मात्र यसको मूल्य ५ लाख ४९ हजार ९ सय रुपैयाँ थियो । नेपालमा नयाँ लट भित्रिएसँगै यसको मूल्यमा १ लाख रुपैयाँ वृद्धि गरियो । तर पनि राइडरहरुले यो मोटरसाइकल यति रुचाए कि बजारमा मोटरसाइकल नै बिक्रीका लागि उपलब्ध छैन ।

होन्डाको डर्ट सेगमेन्टको यो मोटरसाइकल विशेष गरी युवाहरुले निकै नै रुचाउने गरेको पाइन्छ । यसमा १४९.१५ सीसीको फोर स्ट्रोक, सिंगल सिलिन्डर, एयरकुल्ड इन्जिन छ, जसले १२.१४ एचपी पावर र १२.५ एनएम टर्क जेनेरेट गर्छ । ५–स्पिड म्यानुअल गियरबक्सयुक्त सो मोटरसाइकलको अघिल्लो भागमा १८० एमएम एक्सल ट्राभल, टेलिस्कोपिक फोर्क र पछिल्लो भागमा १५० एमएम एक्सल ट्राभल, सिंगल सक स्विङ आर्म सस्पेन्सन छ ।

२४५ एमएम ग्राउन्ड क्लियरेन्स भएकाले यसलाई जस्तोसुकै सडकमा पनि सहज तरिकाले चलाउन सकिन्छ । १२ लिटरको इन्धन ट्यांकी भएको यो मोटरसाइकलको सिटको उचाई ८२५ एमएम छ ।

१५० सीसीको इन्जिनमा उपलब्ध एवं आकर्षक डिजाइनमा उपलब्ध होन्डा एक्सआर १५०एलमा भएको कम्फर्टेबल सिटिङ पोस्चर, एक्सिलेन्ट म्यानुभरेबिलिटी, फ्युल इकोनोमी आदिका कारण यो धेरैको रोजाईमा परेको मान्न सकिन्छ ।