भारतीय कार निर्मातासंग साझेदारी गर्न इच्छुक रहेको होन्डाको घोषणा

काठमाडौं–जापनिज अटो निर्माता होन्डाले भारतमा आफ्नो बजार हिस्सा बढाउन निकै कसरत गरिरहेको छ । कम्पनिले यस दशकको अन्त्यसम्ममा, भारतमा १० नयाँ मोडेलहरू प्रस्तुत गर्ने योजना बनाएको छ । यस महत्वाकांक्षी योजनालाई साकार पार्न कम्पनिले अहिले भारतीय ओईएमसंग साझेदारी गर्ने घोषणा गरेको छ ।

होन्डाले व्यापक सहकार्यको सम्भावनाको खोजी गरिरहेको बताइएको छ, जसमा प्लेटफर्महरू, उत्पादनहरू र प्रविधिहरूको साझेदारी समावेश छन् । होन्डाले आफ्नो ब्याज सेयर गरेर अन्य ओइएमसंग सहकार्य गर्न समेत तत्परता देखाएको हो । साथै, कम्पनी आफ्नो एसिमो अपरेटिङ सिस्टममा पहुँच दिन पनि इच्छुक छ, जसलाई कम्पनीले आफ्नो ओ सिरिजका ईभीमा प्रयोग गर्नका लागि तयार पारेको हो ।

भारतमा पछिल्लो समय प्लेटफर्म साझेदारीको अवधारणा सफल बन्दै गएको छ । कार निर्माताले आफ्नो लागत घटाउन प्रयोग गर्ने उपकरणहरू मध्ये यो एक उत्तम बिकल्पमा रुपमा विकास हुँदै गएको छ ।

भारतको सबैभन्दा ठूलो कार निर्माता मारुति सुजुकीले पनि यो रणनीति अपनाउनु परेको छ र टोयोटासँग सहकार्य गरेको छ । त्यसैगरी, स्कोडा–फक्सवागन र रेनो–निसान जस्ता ब्रान्डहरूले समेत एकआपसमा सहकार्य गरिरहेका छन् ।