मोटरसाइकल दुर्घटना रोक्न होन्डाद्वारा स्टेयरिङ असिस्ट प्रविधिको पेटेन्ट दर्ता

होन्डाले मोटरसाइकल सुरक्षालाई नयाँ स्तरमा पुर्‍याउने उद्देश्यसहित अत्याधुनिक प्रविधिको पेटेन्ट दर्ता गरेको छ। आपतकालीन अवस्थाहरूमा मोटरसाइकलको दिशा अटोमेटिक नियन्त्रण गर्न सक्ने स्टेयरिङ असिस्ट सिस्टमका लागि यो पेटेन्ट दर्ता गरिएको हो ।

अहिलेका आधुनिक मोटरसाइकल एबीएस, ट्रयाक्शन कन्ट्रोल, ह्विली कन्ट्रोलजस्ता विभिन्न इलेक्ट्रोनिक सेफ्टी सिस्टममा आधारित छन्, जसले बाइकलाई स्थिर राख्न मद्दत गर्छ । तर अन्तिम कन्ट्रोल सधैं सवारकै हातमा रहन्छ। होन्डाको सो प्रविधिले सम्भावित टक्करको अवस्थामा बाइकलाई आफैं सुरक्षित दिशातर्फ मोड्न सक्छ ।

पेटेन्ट कागजातअनुसार, सो सिस्टमले क्यामेरा, ब्लाइन्ड-स्पट निगरानी सिस्टम र अन्य सेन्सरहरूको प्रयोग गर्नेछ । यी सेन्सरहरूले सडकमा रहेका सम्भावित जोखिमहरू पहिचान गर्नेछन्। कुनै खतरा देखिएपछि, सिस्टमले परिस्थितिअनुसार हल्का वा आवश्यक परे दृढ स्टेयरिङ इनपुट दिई बाइकलाई जोखिमबाट टाढा लैजाने प्रयास गर्नेछ। सो प्रविधि कारहरूमा प्रयोग हुँदै आएका लेन-किपिङ र टक्करबाट बच्ने सिस्टमसँग मिल्दोजुल्दो भए पनि दुई पाङ्ग्रे सवारी साधनका लागि विशेष रूपमा अनुकूलित गरिएको छ।

होन्डाले यो प्रविधिले दुई फरक तरिकाले काम गर्ने उल्लेख गरेको छ। यदि राइडरले पहिले नै ब्रेक, थ्रोटल वा स्टेयरिङमार्फत प्रतिक्रिया दिइसकेको छ भने, सिस्टमले सन्तुलन नबिग्रने गरी न्यून सहयोग मात्र प्रदान गर्नेछ। तर राइडरले कुनै प्रतिक्रिया नदिएको अवस्थामा सिस्टम बढी सक्रिय हुनेछ र अचानक झट्का नलाग्ने तरिकाले बाइकको दिशा परिवर्तन गर्न सहयोग गर्नेछ।