होन्डा नाभी : अमेरिकी बजारबाट भयो पुनरागमन

भारतीय वा नेपाली बजारमा खासै सफल नमानिएको फरक डिजाइनको होन्डा नाभी अमेरिकी बजारमा लन्च भएको छ । होन्डा एक्टिभा स्कुटरको प्लेटफर्ममा आधारित होन्डा नाभी स्कुटर हो कि बाइक भन्नेमा कम्पनी नै स्पष्ट थिएन । कसैले यसलाई स्कुटर भन्छन् भने कसैले बाइक ।

वास्तबमा बिगिनर–फ्रेन्ड्ली र पिन्ट–साइज्ड मानिएको होन्डा नाभीको तुलनात्मक रुपमा थोरै मूल्य र डिजाइनका कारणले युवा राइडरले मन पराउने विश्वास होन्डाको थियो । तर अपेक्षित मात्रामा यसले बजार लिन सकेन र भारतमा यसको उत्पादन नै बन्द गरियो ।

नेपाली बजारमा पनि यसले राम्रो बजार लिन सकेन । यद्यपि होन्डाको आधिकारिक वितरक स्याकार ट्रेडिङ कम्पनीले अहिले पनि यसलाई मूल्य सूचीमा सामेल गरिरहेको छ । यसको मूल्य १ लाख ६० हजार ९ सय रुपैयाँ मात्र छ ।

अमेरिकामा लन्च गरिएको होन्डा नाभीमा पनि त्यही बीएस३ मोडल उपलब्ध गराइएको छ, जुन कार्बुरेटर इन्जिनसहित छ । यसमा भएको ११० सीसी इन्जिनले उही ८ पीएस पावर र ९ एनएम टर्क जेनेरेट गर्ने बताइएको छ ।

अमेरिकी बजारमा होन्डा नाभीको मूल्य १ हजार ८०७ डलर अर्थात करिब २ लाख रुपैयाँ भन्दा बढी नै तोकिएको छ । ३.८ लिटरको इन्धन ट्यांकी र १५६ एमएमको ग्राउन्ड क्लियरेन्स भएको होन्डा नाभीले अमेरिकी बजारमा कस्तो प्रतिक्रिया पाउला ? होन्डाले अमेरिका लगायतका विभिन्न अन्तर्राष्ट्रिय बजारमा यस्ता मंकी बाइक पहिले देखि नै बिक्री गरिरहेकाले पनि यसले राम्रो बजार लिने अपेक्षा भने गर्न सकिन्छ ।