होन्डाले इलेक्ट्रिक र आईसीई मोटरसाइकलका लागि छुट्टाछुट्टै लोगो प्रयोग गर्ने

होन्डाले आफ्नो ब्रान्ड पहिचानमा ऐतिहासिक परिवर्तन गरेको घोषणा गरेको छ। अबदेखि होन्डाका इलेक्ट्रिक र पेट्रोल अर्थात आईसीई (इन्टरनल कम्बसन इन्जिन) मोटरसाइकलहरू फरक–फरक प्रतीक (एम्ब्लेम) र दृश्य पहिचानका साथ बजारमा आउने भएका छन्। यस नयाँ रणनीतिले कम्पनीको भविष्यको दिशालाई स्पष्ट पार्दै इलेक्ट्रिफिकेशन, प्रविधि र डिजाइनमा नयाँ युगको सुरुवात गर्ने संकेत गरेको छ।

होन्डाले यसपटक तीनवटा फरक एम्ब्लेम (प्रतीक) प्रस्तुत गरेको छ। तीमध्ये दुईवटा पेट्रोल मोटरसाइकलका लागि र एउटा इलेक्ट्रिक मोटरसाइकलका लागि हुनेछ । कम्पनीले यस कदमलाई “भविष्य र परम्पराको सहअस्तित्व“ भनेर परिभाषित गरेको छ - जसअन्तर्गत परम्परागत विङ लोगोको विरासतलाई कायम राख्दै इलेक्ट्रिक युगको लागि नयाँ दृश्य भाषा अपनाइएको छ।

इलेक्ट्रिक मोटरसाइकलहरूमा अब मिनिमलिस्ट र आधुनिक डिजाइनमा तयार गरिएको नयाँ “होन्डा” वर्डमार्क लोगो प्रयोग गरिनेछ। यो फन्ट पहिलो पटक ज्यलमब डब्लुएन७ इलेक्ट्रिक मोडलमा देखिएको थियो।

नयाँ लोगोले होन्डाको “स्वच्छ, प्रविधिमुखी र भविष्यमुखी“ छवि प्रस्तुत गर्ने उद्देश्य बोकेको छ। यसैसँगै, यो डिजाइनले अब इलेक्ट्रिक शोरुम, चार्जिङ स्टेशन र मार्केटिङ सामग्रीहरूमा पनि एकरूपता ल्याउनेछ।

कम्पनीका अनुसार, इलेक्ट्रिक लाइनअपका उत्पादनहरू अबदेखि स्वतन्त्र रूपमा ब्रान्ड गरिनेछन्, जसले ग्राहकलाई पेट्रोल र इलेक्ट्रिक उत्पादनबीच स्पष्ट छुट्याउन सहज बनाउनेछ।

होन्डाको विख्यात “विङ” लोगो सन् १९४७ देखि प्रयोग हुँदै आएको हो, जसले कम्पनीको स्वतन्त्रता, गति र नवप्रवर्तनको प्रतीक बनेको छ। अब यस लोगोका दुई नयाँ रूप प्रस्तुत गरिएका छन् — एक फ्ल्यागशिप मोडलहरूका लागि र अर्को मिड–टायर तथा कम्युटर मोटरसाइकलहरूका लागि।

फ्ल्यागशिप मोडलहरूका लागि नयाँ सिल्भर विङ लोगो प्रयोग हुनेछ । होन्डा सीबीआर १०००आरआर–आर फायरब्लेड, रिबेल ११०० र गोल्ड विङ लगायतका प्रिमियम र उच्च प्रदर्शनका मोडलहरुमा अब कालो पृष्ठभूमिमा चम्किलो सिल्भर विङ लोगो प्रयोग हुनेछ । यो डिजाइनले “शक्ति, प्रतिष्ठा र उत्कृष्ट इन्जिनियरिङ”को भावना झल्काउँछ।

नयाँ लोगो पहिलो पटक ईआईसीएमए २०२५ मा प्रदर्शित बाइकहरुमा देखाइएको छ र अबदेखि सबै फ्ल्यागशिप मोडलमा यसको प्रयोग हुनेछ।

एक्टिभा, साइन, युनिकर्न वा हर्नेट जस्ता दैनिक प्रयोगका लागि बनाइएका मोटरसाइकलहरूमा भने पहिलेझैँ रातो पृष्ठभूमिमा सिल्भर विङ र तल “होन्डा” लेखिएको लोगो नै कायम हुनेछ। यसले होन्डाको परम्परा, विश्वसनीयता र सहजता जनाउनेछ।

होन्डाको यो कदम केवल लोगो परिवर्तनमा सीमित छैन। यो समग्र ब्रान्ड दर्शन र व्यवसायिक दृष्टिकोणमा रूपान्तरण हो। कम्पनीले विश्वभरका ग्राहकहरूलाई अब दुईवटा फरक तरिकामा सन्देश पठाउनेछ - एक, परम्परागत पेट्रोल इन्जिनमा आधारित प्रदर्शन र विश्वसनीयतामा गर्व गर्ने होन्डा, र अर्को, सफा ऊर्जा, प्रविधि र भविष्यमुखी गतिशीलताको प्रतिनिधित्व गर्ने इलेक्ट्रिक होन्डा।

नयाँ लोगो र ब्रान्ड आइडेन्टिटी अब २०२६ आर्थिक वर्षदेखि विश्वव्यापी रूपमा लागू हुने बताइएको छ। यसले केवल उत्पादनमा होइन, शोरूम डिजाइन, डिजिटल उपस्थिति, मिडिया सामग्री र विज्ञापन शैलीमा पनि परिवर्तन ल्याउनेछ।

होन्डाका ईभी शोरूमहरूमा भविष्यमुखी डिजाइन, न्यून रंग योजना र डिजिटल इन्फोटेनमेन्ट अनुभवलाई प्राथमिकता दिइनेछ। यसले नयाँ पुस्ताका ग्राहकहरू - विशेषगरी युवा र पर्यावरण सचेत उपभोक्ताहरू - लाई आकर्षित गर्ने लक्ष्य राखेको छ।