होन्डाले थप्यो २ नयाँ बिग बाइक, अब नेपालमा ८ वटा मोडल उपलब्ध

होन्डा मोटरसाइकलको नेपालका लागि आधिकारिक बितरक स्याकर ट्रेडिङ कम्पनीले टेकुस्थित होन्डा विग विंग सोरुममा थप २ नयाँ मोडलका बिग बाइक उपलब्ध गराएको छ । हालसालै नेपाल भित्रिएका सीआरएफ ३००एल र ३००एल ¥याली समेत थप भएपछि नेपालमा होन्डाको बिग बाइक संख्या ८ पुगेको छ ।

कम्पनीले १५० सिसी क्षमताको अफरोड बाइक एक्सआर १५० देखी सुपर स्पोर्ट बाइक सिबिआर ६०० आरआर सम्मका ८ वटा मोडललाई समेटेर बिग बाइकका रुपमा बजार प्रबद्र्धन गर्दै आइरहेको छ ।

होन्डाको बिग बाइकमा सामेल सबैभन्दा सस्तो मोडलका रुपमा एक्सआर १५० एल रहेको छ । यो बाइकको मूल्य ६ लाख ४९ हजार रुपैयाँ निर्धारण गरिएको छ । एक्सआर १५० पछि दोस्रो सस्तो बिग बाइकका रुपमा एक्सआर १९० एल रहेको छ । यो बाइकको मूल्य यसअघि ६ लाख ४९ हजार रुपैयाँ निर्धारण गरिएपनि हाल स्टकमा उपलब्ध नरहेको कम्पनी स्रोतले बताएको छ । नयाँ लट आएपछि यसको मूल्य समेत बढेर आउने उक्त स्रोतको भनाई छ ।

त्यसैगरी सिबिआर २५० आरको मूल्य ६ लाख ७९ हजार र यसैमा एबिएस समेत उपलब्ध भएको मोडललाई भने ७ लाख ९३ हजार रुपैयाँ पर्ने बताइएको छ ।

केही समय अघिमात्र नेपाल भित्रिएको क्रुजर बाइक हाइनेस सिबी ३५० र रेट्रो क्लासिक लुक्सको सिबी ३५० आरएस मोडल समेत अहिले चर्चित बनिरहेका छन । यी बाइकको मूल्य क्रमश ७ लाख ७५ हजार र ७ लाख ९९ हजार रुपैयाँ निर्धारण गरिएको छ ।

नयाँ भित्रिएका सीआरएफ ३००एल र ३००एल -याली मोटरसाइकलको मूल्य क्रमशः १७ लाख ५० हजार र १९ लाख ५० हजार रुपैयाँ तोकिएको छ । सबैभन्दा महंगो सुपर स्पोर्टस बाइक सिबिआर ६०० आरआरको मूल्य ३४ लाख ५० हजार रुपैयाँ तोकिएको छ ।