होन्डा एक्टिभाले पार ग-यो ३ करोड ५० लाख युनिट बिक्रीको माइलस्टोन

भारतको सबैभन्दा लोकप्रिय स्कुटरमध्ये एक होन्डा एक्टिभाले नयाँ इतिहास रचेको छ। यस स्कुटरले हालै ३ करोड ५० लाख युनिट बिक्रीको रेकर्ड कायम गरेको छ। यो उपलब्धिसँगै एक्टिभा भारतकै सबैभन्दा बढी बिक्री हुने स्कुटर बनेको छ।

होन्डा एक्टिभा सन् २००१ मा पहिलोपटक बजारमा आएको हो। सुरुमा साधारण डिजाइन र सहज सवारीका कारण लोकप्रिय बनेको यो स्कुटर अहिले विभिन्न भर्सनमा उपलब्ध छ, जसमा एक्टिभा ११०, एक्टिभा १२५, र एक्टिभा–आई प्रमुख हुन्।

लगातार बढ्दो लोकप्रियता
एक्टिभाको लोकप्रियता समयसँगै झन् बढ्दै गयो। पहिलो १ करोड युनिट बिक्री गर्न यस स्कुटरलाई करिब १४ वर्ष लाग्यो । सन् २०१५ मा सो स्कुटरले उक्त माइलस्टोन हासिल गरेको थियो । तर त्यसपछि यसको बिक्री गति तीव्र भयो र अर्को १ करोड युनिट बिक्री गर्न मात्र तीन वर्ष अर्थात २०१८ सम्म लाग्यो। अहिले २०२५ मा आइपुग्दा एक्टिभाले ३ करोड ५० लाख युनिट बिक्री गर्दै नयाँ माइलस्टोन पार गरेको छ।

यो स्कुटर हाल पनि होन्डाको भारतमा सबैभन्दा बढी बिक्री हुने दुईपांग्रे सवारी हो। कम्पनीका अनुसार एक्टिभाको योगदान मात्रले कुल बिक्रीको ५० प्रतिशतभन्दा बढी हिस्सा ओगटेको छ।

सफलताका कारण
एक्टिभाको सफलता पछाडि धेरै कारण छन्। सबैभन्दा ठूलो कारण यसको सादगी र भरपर्दो डिजाइन हो, जसले सहरदेखि गाउँसम्मका मानिसलाई सहज बनाएको छ। पुरुष मात्र होइन, महिला, वृद्ध र युवाहरू सबैले यो स्कुटर रोज्ने गरेका छन्। मोटरसाइकलको तुलनामा एक्टिभा चलाउन सजिलो र सुरक्षित मानिन्छ, विशेषगरी साडी लगाउने महिलाहरूका लागि यो धेरै नै उपयुक्त छ ।

यसका साथै यसको कम मर्मत खर्च र व्यापक सर्भिस नेटवर्क पनि ठूलो बल बनेको छ। भारतभर रहेका हजारौँ होन्डा डिलरशिपहरूका कारण सानो सहरमा पनि मर्मत गर्न सकिन्छ भने पाट्र्स सजिलै पाइन्छ।

लगातार अपडेट र नयाँ प्रविधि
होन्डाले समयसँगै ग्राहकहरूको आवश्यकतालाई ध्यानमा राख्दै एक्टिभामा नयाँ प्रविधि र फिचरहरू थप्दै आएको छ। हालका मोडलहरूमा कम्बी–ब्रेक सिस्टम (सीबीएस), एच–स्मार्ट टेक्नोलोजी, स्मार्ट की सिस्टम, एलईडी हेडलाइट, डिजिटल कन्सोल र ब्लुटुथ कनेक्टिभिटी जस्ता आधुनिक विशेषताहरू उपलब्ध छन्।

नतिजा
होन्डा एक्टिभाको २४ वर्ष लामो यात्राले यसलाई भारतको दुईपांग्रे बजारमा एक अविस्मरणीय नाम बनाएको छ। यसको विश्वसनीयता, आराम र प्रयोगमा सजिलोपनले गर्दा एक्टिभा अझै पनि धेरैका लागि पहिलो रोजाइ बनेको छ।

नेपालमा अवस्था
नेपाली बजारमा भने होन्डा एक्टिभाले भारतको तुलनामा अपेक्षित बजार लिन सकेको पाइदैन । नेपालमा होन्डाको डिओ स्कुटर लोकप्रिय भएका कारण पनि यसो भएको हुन सक्छ । नेपाली बजारमा होन्डाको डिओ स्कुटरले नै धेरैलाई लोभ्याएको पाइन्छ । यसकारण पनि हुन सक्छ, होन्डा एक्टिभा स्कुटर होन्डा नेपालको वेबसाइटमा समेत राखिएको पाइदैन ।