२०७७ चैत ३० सोमबार,

इतिहास : यस्तो थियो भरत शमशेरको विवाहमा प्रयोग भएको गाडी

Post adv
२००७ सालमा राजा तथा जनताको सहयोगमा १०४ वर्ष लामो राणा शासन समाप्त भयो । देशमा प्रजातन्त्र आयो । जसरी अहिले नेपालीले गणतन्त्र आए के के न होला भन्ने सोचेका थिए त्यो समय पनि राणा शासन हटेपछि देशले धेरै कुरा पाउनेछ । जनताको सुखसयल बढ्नेछ भन्ने सपना देखेका जनतामा तुषारापात भएको थियो । शुरुमा भारत सरकार अझ भनौ नेहरुको षडयन्त्रले नाम मात्रको स्वतन्त्रताको अनुभूति भयो । भारतिय दवावमा हरेक काम गर्नुपर्ने निर्णयहरु गर्नुपर्ने बाध्यता भयो । २००७ सालको शुरु देखि नै जव राणाहरु बिरुद्धको आन्दोलन चर्किन थाल्यो । राणाहरुका एकथरी पनि राणाशासनको समर्थनमा आन्दोलन गर्न थाल्यो । २००७ सालको पौष २० गते गौचरमा भरत शम्शेरको नेतृत्वमा हातमा खुकुरी लिएका एक जमातले प्रदर्शन गर्न थाल्यो । ववरशम्शेरका नाति भरतशम्शेरले "वीर गोरखा दल" को नामबाट समुह एकत्रित गरेका थिए । हातमा खुकुरी बोकेर हिड्ने भएको हुँदा जनताले भने खुकुरी दल भनेर भन्न थाले । २००७ सालको कार्तिकमा भारत पुगेका राजा, भारतका लागी नेपाली राजदुत सिंहशम्शेर तथा भारतीय प्रधानमन्त्री नेहरु बिचको छलफल पछि तैयार बनाइएको बुँदाहरुलाई राणा प्रधानमन्त्री मोहनशम्शेरले पौष २४ गते स्विकार्न बाध्य भए । फागुन ७ मा देशमा राणाशासन समाप्त भएको घोषणा भयो । तर केही समयको लागी मोहनशम्शेरले प्रधानमन्त्रीत्व र बबर शम्शेरले रक्षा मन्त्रालयको जिम्मा लिए । राणाहरुको षडयन्त्र समाप्त भएको थिएन । दार्जिलिङबाट गोरखा लिगका सदस्य रणधिर सुब्बालाइ पनि काठमाडौ बोलाएर वीर गोरखा दलको प्रमुख सल्लाहकार बनाइएको थियो । खुकुरी दलको आतङ्कको विरोधमा काठमाडौ तथा पाटनको टोलटोलमा रक्षा मण्डल गठन गरिएको थियो । अन्तत गृह मन्त्री विपी कोइरालाको पहलमा खुकुरी दलमाथी २००७ साल फागुन १९ गते प्रतिवन्ध लाग्यो । खुकुरी दल अझ हिंस्रक बन्न थाल्यो । अन्तत चैत्र ३० गते बिहान ६ बजे नै भरतशम्शेर तथा रणधिर सुब्बा पक्राउ परे । जसको विरोधमा निस्केको खुकुरी दलको हिंस्रक जुलुसले गृहमन्त्री विपी कोइरालाको निवासमा आक्रमण गर्न गयो । यो प्रयास विपीको हत्याको प्रयास थियो । विपीले आफ्नो सुरक्षार्थ हानेको गोलीले खुकुरी दलका एक कार्यकर्ता सुवेदार कुलध्वजको मृत्यु भयो । भिडले भरतशम्शेर र रणधिर सुब्बालाई निकालेर लग्यो । खुकुरी दलको हिंस्रक जुलुस बजारमा घुमिरह्यो । टुँडिखेलमा कवज गरिरहेका सैनिकहरुलाई भरतशम्शेरले भड्काउन खोज्यो तर सेनापति केशरशम्शेरले रोक्यो । यदि त्यो समय केशर शम्शेर राणाहरुको समर्थमा सेनालाई उक्साएको भए । फेरी अर्को कोटपर्व हुन्थ्यो । सयौ जनताको साथसाथै विपी, गणेशमान र कृष्णप्रसाद लगायत कैयौ नेताहरु मारिन्थे । त्यहि साँझ भरतशम्शेर फेरी समातिए । यहि निहुमा प्रधानमन्त्री मोहनशम्शेरलाई विपीको हत्याको प्रयासको आरोप लाग्यो । जसले गर्दा प्रधानमन्त्रीको राजिनामा माग्न थालियो । फलस्वरुप चैत्र ३१ गते राजा त्रिभुवनको अध्यक्षतामा मन्त्रीमण्डलको बैठक बस्यो । तर अचानक भारतीय राजदुत सिपिएन सिंह तथा राजा त्रिभुवनको सचिवको रुपमा नेहरुले पठाएका भारतीय नागरिक गोविन्दनारायणको षडयन्त्रले मोहनशम्शेरको राजिनामा रोकियो । तर श्री ३ को ब्यक्तिगत सुरक्षाको लागी तत्पर बिजुली गारदलाई सिंहदरवारबाट हटाएर नारायणहिटी लगियो । यछि यहि सेना राजाको निजि सेना झै बन्दै गयो । बैशाख ८ गते मोहनशम्शेर सिंहदरवारबाट बाहिरिए । आफ्नै निजी निवास लक्ष्मी निवासमा सरे । २००८ को जेठ २६ गते मोहनशम्शेरकै प्रधानमन्त्रीत्वमा मन्त्रिमण्डलको पुनर्गठन भयो । यसरी २००८ सालमा प्रतिवन्धित भएको वीर गोरखा दलका अगुवा भरतशम्शेरले २०१५ सालको आमचुनावमा नेपाल राष्ट्रवादी गोरखा परिषदको नामबाट चुनावमा भाग लिए । कुल १०९ स्थान मध्य ८६ स्थानमा आफ्ना प्रत्यासी उठाएका थिए । परिणाम आँउदा १९ सिटमा विजय हासिल गरेर प्रमुख प्रतिपक्ष दलको रुपमा पहिलो संसदमा स्थापित हुन सक्यो । साथै भरत शम्शेर सोही दलको अगुवाको रुपमा प्रमुख प्रतिपक्षी दलको नेताको रुपमा रहे । तर यो समय लामो रहेन । अचानक राजा महेन्द्रले संसद विघटन गराइ सबै नेताहरुलाई नजरवन्दमा राखे । भरतशम्शेर पनि जेल परे । पंचायत कालमा आफ्नो दललाई निशर्त कांग्रेसमा विलय गराएर पंचायतको विरुद्धमा लागे । भारत निर्वासनमा रहदा कलकत्तामा बसेर चलचित्र निर्माण गर्न थाले । सन १९७१ मा निर्मित सिमाबद्ध नामक बंगाली चलचित्र प्रख्यात निर्दशक सत्यजित रायको निर्देशनमा बनेको थियो । जुन चलचित्र शर्मिला टैगोर अभिनित थियो । यस चलचित्रले राष्ट्रिय चलचित्र पुरस्कार तथा भेनिस फिल्म फेस्टिवलमा पनि एवार्ड जित्न सफल भएको थियो । यस चलचित्रको साथसाथै अन्य केही चलचित्र पनि बनाएका थिए । यिनै भरत शम्शेर राणाको गत वर्ष २०७५ साउन २६ गते कलकत्तामा देहावसान भयो । यहाँ उनै भरत शम्शेर राणाको विवाहको समारोहको लागि जाँदै गरेका दरवारिया चेली, सुसारे तालिमे नानीहरुलाई देख्न सकिन्छ । २९ नम्बरको यो गाडीमा पछाडी लहरै दरवारिया चेली, सुसारे, तालिमे नानीहरुलाई छाता ओढेर बसेको देख्न सकिन्छ । विवाहमा दुलाहा दुलही भने बग्गीमा जाने चलन थियो । भरत शमशेरकी रानीको पनि हालै निधन भएको छ । उनलाई जेठी मुमा भनिन्थ्यो । शब्द/तस्बिर : सुनिल उलक

Advertise Eleven Advertise Ten Advertise Nine
Post adv

लोकप्रिय

नेपाल आइपुग्यो भारतमा निकै रुचाइएको किया सोनेट, यस्तो छ मूल्य र विशेषता

नेपाल आइपुग्यो भारतमा निकै रुचाइएको किया सोनेट, यस्तो छ मूल्य र विशेषता

काठमाडौं – कियाको बहुप्रतीक्षित कार किया सोनेट नेपाली बजारका लागि...

कहाँ जान्छन् एक्सचेन्जमा उठाइएका पुराना मोटरसाइकल

कहाँ जान्छन् एक्सचेन्जमा उठाइएका पुराना मोटरसाइकल

नयाँ बाइकको बिक्री बढाउन बिभिन्न आयतकर्ता कम्पनीहरुले प्रायः बाह्रै...

बीएमडब्ल्यु बाइकः १० हजार किलोमिटर अर्थात वर्षमा एकपटक सर्भिसिङ गरे पुग्ने, खर्च समेत निकै कम

बीएमडब्ल्यु बाइकः १० हजार किलोमिटर अर्थात वर्षमा एकपटक सर्भिसिङ गरे पुग्ने, खर्च समेत निकै कम

जर्मन अटो ब्रान्ड बीएमडब्ल्युका बाइक अहिले नेपाली बजारमा लोकप्रिय...