हिरो इलेक्ट्रिक बाइक उत्पादन गर्ने चर्चासँगै बढ्यो हिरो मोटोकर्प र हिरो इलेक्ट्रिक विवाद

हिरो मोटोकर्पले हिरो ब्रान्डमा इलेक्ट्रिक टु ह्विलर उत्पादन गर्ने प्रक्रिया अघि बढाएपछि भारतमा अहिले मुन्जाल परिवारमा विवाद देखिएको छ । यो विवाद हिरो मोटोकर्पका अध्यक्ष पवन मुन्जाल र नातामा उनका काका पर्ने हिरो इलेक्ट्रिकका मालिक विजय र नवीन मुन्जाल बिच देखिएको हो ।

सम्पत्तिको भागबन्डा हुँदा पवनको नाममा हिरो मोटोकर्प र नवीनका नाममा हिरो इलेक्ट्रिक बाँडिएको थियो । सोही आधारमा यी काका भतिजले छुट्टाछुट्टै ब्रान्डमा टु ह्विलर उत्पादन गरी बिक्री वितरण गर्दै आइरहेका थिए । नवीन मुन्जालका अनुसार अंशबन्डा हुँदा खेरी नै हिरो ब्रान्ड राखेर इलेक्ट्रिक टु ह्विलरको उत्पादन आफूले मात्र गर्न पाउने सहमति भएको थियो । उक्त सहमतिलाई उल्लंघन गरेर पवन मुन्जालले हिरो ब्रान्डमा छुट्टै इलेक्ट्रिक टु ह्विलर उत्पादन गर्ने प्रक्रिया थालेपछि उनले यो विषयलाई अदालतसम्म पु¥याएका छन् ।

उता पवन मुन्जाल भने हिरो ब्रान्ड आफू मातहत भएका कारण यो ब्रान्डमा जुनसुकै प्रकारको सवारीसाधन उत्पादन गर्न आफूलाई कसैले रोक्न नसक्ने अडानमा छन् । भारतको सबैभन्दा ठूलो टु ह्विलर उत्पादक हिरो ब्रान्डमा इलेक्ट्रिक टु ह्विलर समेत उत्पादन गर्दा बजार लिन सजिलो हुने उनको बुझाई छ । नयाँ ब्रान्डमा उत्पादन थाल्दा ब्रान्डिङ र प्रमोशनमा ठूलो रकम बचत हुने पवनको बुझाई रहँदै आएकोे छ ।

काका भतिजबीचको यो मुद्धामा भारतका केही बजार बिश्लेषकहरुले समेत मुख खोलेका छन् । उनीहरुमध्ये अधिकांशले विजय र नवीन मुन्जालको पक्षमा आफ्नो धारणा राख्दै आएका छन् । केही विश्लेषकहरुले भने यो मुद्धामा पवन मुन्जाल मुछिनु राम्रो नुहुने सुझाव दिएका छन् । इलेक्ट्रिक टु ह्विलरका लागि पवनले नयाँ नाम लिएर आफ्नो प्रोजेक्ट बढाउनु उत्तम हुने उनीहरुको भनाई छ ।

जसरी ओला, सिम्पल वान, एथर लगायत नयाँ स्टार्टअप कम्पनीले इलेक्ट्रिक टु ह्विलरका राम्रो गरिरहेका छन् त्यसैगरी पवनले नयाँ नाममा उत्पादन थाले यसले समेत छिट्टै लोकप्रियता पाउने उनीहरुको राय छ । बजाजले चेतक ब्रान्डमा इलेक्ट्रिक टु ह्विलर उत्पादन थालेको र यसमा सफलता समेत हात पार्दै गएको उदाहरण दिँदै उनीहरुले पवन मुन्जाललाई नयाँ नाममा उत्पादन थाल्नु उचित हुने सुझाव दिएका हुन् ।

त्यसो त पवन मुन्जालको हिरो मोटोकर्पले यसअघि नै एथर ब्रान्डमा लगानी गरिसकेको छ । साथै उसले केही समयअघि मात्र एथरमा थप ४२० करोड भारु लगानी थप्ने बताएको थियो ।

नेपाली बजारमा हिरो इलेक्ट्रिक ब्रान्ड हालै भित्रिएको छ । लक्ष्मी ग्रुप अन्तर्गतको लक्ष्मी ई मोबिलिटीले यसको आधिकारिक वितरकको रुपमा कार्य गरिरहेको छ । त्यसैगरी हिरो मोटोकर्पका बाइक र स्कुटर भने ज्योति ग्रुप अन्तर्गतको नेपाल जनरल मार्केटिङ प्रालिले बिक्री–वितरण गरिरहेको छ ।