नाइमा एक्सपोमा चर्चित दुई कार : एउटामा २५ लाख र अर्कोमा २० लाख छुट

काठमाडौं – काठमाडौंको भृकुटीमण्डमा जारी नाइमा मोबिलिटी एक्सपो २०२५ मा कार कम्पनीहरुले उपलब्ध गराएको छुट यतिबेला चर्चामा छ । ती मध्ये पनि सर्बाधिक चर्चा दुई कारले पाएका छन् ।

ती दुई मध्ये एउटामा २५ लाख र अर्कोमा २० लाख रुपैयाँ छुट उपलब्ध छ । यति धेरै छुट उपलब्ध हुँदा यी दुवै मोडलको मूल्य पनि धेरैका लागि चासो हुने नै भयो ।

सबैभन्दा बढी छुट प्युजो ३००८ मा छ । प्युजो ३००८ पेट्रोलियम पदार्थबाट चल्ने सवारी साधन हो । यसको मूल्य १ करोड ७५ लाख रुपैयाँ छ । नेपालका लागि आधिकारिक वितरक सांग्रिला मोटर्सले २५ लाख रुपैयाँ छुट उपलब्ध गराएका कारण अब यो गाडी १ करोड ५० लाख रुपैयाँमै उपलब्ध हुनेछ ।

प्युजो ३००८ मा १५९८ सीसीको फोर सिलिन्डर पेट्रोल इन्जिन छ, जसले १६५ एचपी पावर र २४० एनएम टर्क जेनेरेट गर्छ ।

त्यसैगरी निसान लिफको मूल्य ६४ लाख ९९ हजार रुपैयाँ रहेकोमा नाइमामा विशेष अफरको रुपमा २० लाख रुपैयाँ छुट उपलब्ध गराइएको छ । यस अनुसार निसान लिफको मूल्य अब ४५ लाख रुपैयाँ तोकिएको छ ।

निसान लिफको इन्टेलिजेन्ट पावर अन्तर्गत यसमा ४० किलोवाट आवरको ब्याट्री जडान गरिएको छ र एकपल्ट चार्ज गर्दा ३ सय ११ किलोमिटरसम्म चलाउन सकिन्छ । यसको अधिकतम गुड्ने क्षमता प्रतिघन्टा १४० किलोमिटर छ । ग्राहकहरुले यसलाई सजिलैसँग चार्ज गर्न सक्नेछन् । घरमा नै डेडिकेटेड वाल आउटलेटबाट १५ देखि १८ घण्टामा र निसानको चार्जिङ स्टेसनबाट ४० देखि ६० मिनेटमा फुल चार्ज गर्न सकिन्छ ।

निसान लिफ विश्व बजारमा निकै नै रुचाइएको इलेक्ट्रिक सेडान हो । नेपाली बजारमा पायोनियर मोटोकर्पले यो गाडी बिक्री गरिरहेको छ ।

किन हुन्छ यति धेरै छुट ?
गाडी कम्पनीहरुले यति धेरै छुट दिदा ग्राहक वा अवलोकनकर्ता पनि आश्चर्यमा पर्ने गरेको पाइन्छ । कम्पनीहरुले यति धेरै नाफा खाने गरेका हुँदा रहेछन् भनेर चर्चा समेत चल्ने गरेको पाइन्छ ।

तर पनि वास्तविकता भने फरक हुन्छ । कुनै समयमा नेपाल भित्र्याएका यस्ता मोडल अब थोरै संख्यामा मात्र बिक्री गर्न बाँकी रहेका हुन्छन् । यो अवस्थामा स्टक क्लियरेन्सका लागि घाटा खाएरै पनि कम्पनीहरुले यस्ता सवारी साधनमा भारी छुट उपलब्ध गराउने गरेको पाइन्छ ।

यद्यपि हाल छुटमा उपलब्ध कम्पनीहरुले यस वारेमा आधिकारि रुपमा कुनै जानकारी प्रदान गरेका छैनन् । तर पनि यस्ता मोडलमा दिइएको छुटमा पनि यस्तै कारण हुन सक्ने अनुमान गर्न सकिन्छ ।